Total Pageviews

Thursday, April 28, 2011

Higala, Ania Ra Ko

Higala, Ania Ra Ko
By Genamos_US of Washington DC, USA

Lawom ang imong gihunahuna
Kasub-anan ang akong nakita
Mga mata mo adunay gitapigan
Nga may gipas-an nga suliran

Nasabtan ko ang imong gibati
Ang adlaw mo gisugat nga bati
Bisag wala mo ako gisulti-an
Sa kalisdanan mong gipas-an

Ania ra ko sa imong kiliran
Andam nga imong suginlan
Ang palad ko dili ikaw balibaran
Suginli ako aron ikaw matabangan

Sa gibati mo nga ikaw nag-inusara
Ayaw kalimot nga adunay kay higala
Higala, ania ra ko sa imong duol
Ayaw ikaulaw kung ikaw napandol

Ayaw pag-atras kung walay ikasukol
Sa kalisdanan nga padayon naghasol
Mag-ampo sa Dios aron magiyahan
Kon ang kinabuhi giduaw gihilabtan

Ania ra ko nga andam maminaw
Mga luha mo ipagawas ipahungaw
Ang abaga ko andam ipahulam
Sa mga bakho mong natilawan

Pahiran ko ang imong mga luha
Midagayday sa aping mibaha
Sa panyo kung puti binordahan
Nga siniprahan sa akong inahan

Kon man gani ikaw napakyas
Sa gugma nga milingkawas
Ayaw paglingi sa kagahapon
Pagtulun-an sa kinabuhi isipon

1 comment:

  1. GOOD 1,GEN.MAAYONG PAGKAHAN-AY SA IMONG BALAK.

    ReplyDelete