Total Pageviews

Tuesday, November 19, 2013

Ang Kaniadto

Ang Kaniadto
By Genamos_US of Washington DC, USA

Pagkaanindot pagahandumon
Ang mga nanglabayng panahon
Yano apan puno sa kalingawan
Gihandom kanunay ning dughan

Pagtungtong ko sa elementarya
Uso pa kaniadto ang mga baraha
Giimprenta ang mga matag salida
“The longest Day” ug mga “Ninja”

Mga lastiko, kasing ug mga tabanog
Pun-an sa eskoter na pagkaalingogngog
Magtubigtubig inig abot sa kagabhion
Magbato lata ug dyulen sa kabuntagon

Magtabisay ang among mga singot
Sa duwaduwa gayud kami nahimoot
Dili man haytek kaniadto apan lingaw
Kanako walay sayang nga mga adlaw

Kon dili man makatakyan ug makasyatong
Adto ra mi sa balili magbalintongbalintong
Way gubot ug saba ang palibot kaniadto
Minos ang mga balay ug dyip may esteryo

Dili kaayo mi magsuroysuroy bisag asa
Kay hadlok unya makasugat og paregla
Anha ra kami sa among dapit kasilinganan
Kay managkaila ra ug dali ra mi matoltulan

Matag kalye adunay iyang mga kapilya
May kaugalingong buwan magpiyesta
Magpaminaw kon asa ang bayle ug kombira
Kay aron mosayaw ug mokaon ang barkada

Malingaw ra mi sa ays kendi ug ays drap
Pun-an sa mga lamian na pan di maihap
May pan pransis, bahogbahog ug borikat
Pun-an sa init na shakoy ug botsi makalibat

Mga kinaham sa mga bugoy ug mga sipat
Kon matilawan mo ang kalami makakidhat
Magkatawa ta sa mga ngalan gipangpagya
Ambot karon kon aduna pa bay namaligya

Ay ang kaniadto, matam-is nga palandungon
Milabayng  panahon nahikalimtan na sugilanon
Gitagamtam ang matag gutling nga nahisubay
Sa hunahuna ko daw dili pa gyud kini dugay

Monday, November 18, 2013

Awhag Ko Kaninyo Da



Awhag Ko Kaninyo Da
By Genamos_US  of Washington DC, USA

Dili ko matugkad ang gibati kung kasobo
Ang kapait ug pagsulay kita nahidugmo
Walay luna nahimotangan ning dughan
Ang kasakit nasinati sa atong kaigsoonan

Ang katalagman miduaw sa atong nasod
Ang tanan mahikogang sa kadaut misulod
Labi na didto sa Leyte, Samar ug Sugbo
Apil na ang mga isla sa Palawan ug Iloilo

Daghan ang nakabsan sa ilang  mga kinabuhi
Way gipinig,  madato man o kabus way gipili
May mga nangawala hangtod karon gipangita
Kon buhi pa ba intawon sila nanghinaot makita

Mitulo ang akong mga luha sa kalooy miguwa
Ang kahapdos ning kasingkasing dili mawala
Sa mga bidyo ug piktyur nga akong nakita
Makaloloy silang tanan labi na ang mga bata

Ang kagutom ug kalisod ilang natagamtaman
Hilak ug bakho sa daplin intawon gitapigan
Nangindahay kanato nga ato silang tabangan
Tabang na kinasingkasing ug dili pagabayran

Midagsa ang mga kalibog ug dili ko masabot
Kon ngano dugay ang tabang kanila miabot
Daghan ang nawad-an og pasinsya na biktima
Kay ang dakong kalisod di na gyud maagwanta

Dili nato paaboton nga sa kagutom sila makalas
Dili nato dungagan ang ilang kapait ug kadimalas
Kaloy-an nato sila ug iapil sa atong mga pag-ampo
Nga kining tanan ilang malagpasan ug dili modako

Ato na balang itugyan sa goberno ang tanan?
Bisan hinay ang pagrespondar sa mga kakulian
Sama niining kalamidad nga atong nahiaguman
Dili kita andam ug kulang sa sistema gipatuman

Bisag naghugno kining atong mga kasingkasing
Mga pagmahay sa kinabuhi ato nalang ipatapsing
Kay mosamot kahoot ning atong mga dughan
Sa walay lami na politika sa nasod pagahisgotan

Dili ko nalang kini tas-on ang balak kung gisulat
Sa pagtuki sa mga way laming nangagi ug buhat
Kay ang akong tumong  mao ang mga nabiktima
Na sa karon nanginahanglan kanato sa tabang ta

Ang mga nabiktima hatagan nato silag importansya
Ning atong mga dughan ug tagsatagsa ka mga bulsa
Nanghinaot na dili kita magtubili sa pagtabang kanila
Kay dili kabayran og salapi ang ilang kalisod na gidala