Total Pageviews

Sunday, December 15, 2013

Mga Pasiaw Ni Noy Eking

Mga Pasiaw Ni Noy Eking
By Genamos_US of Washington DC, USA

Mga pasiaw makalingaw
Mga komedyang inamaw
Nagkiat lang ang nawong
Sa karsones na makapawng

Makawagtang sa kalaay
Mga suliran ug pagsulay
Libre nga tambal ug epektibo
Sa atong kasingkasing makaayo

Daghan kitang madunggan
Sa mga pasiaw nabunalan
Ang pasiaw dili para sa tanan
Alang kini sa nawong kublan

Daghan usab ang maglagot
Mga yagayaga makapungot
Mga biaybiay na makasapot
Basta di lang sobrang modut

Naglisngag kuno ang ilong
Bahalag murag sandayong
Basta malipay ug malingaw
Sa pasiaw sa mga kulisaw

Pastilan kon kitay tawagon
Kay ang atong  ilong lisngagon
Kon tinood pasensya intawon
Kay ang pinoy kuno hinawayon

Aduna akoy lain nga pasiaw
Silingan namo kaliwat og opaw
Kon maligo mangita man og shampoo
Naglibog ko kay hawan man ang ulo

Porbida ni si kompareng Esyot
Abtik kaayo sa matrona ug bayot
Sa tanang butang siya sinuplayan
Inig buwag sikwester sad ang tanan

Diri nalang ko kutob mga higala
Kay napaig ang tulingan gisugba
Sa sunod higayon nato ipadayon
Basin si Kumander dili makakaon

Wednesday, December 4, 2013

Ang Paskohanong Pangandoy

Ang Paskohanong Pangandoy
By Genamos_US of Washington DC, USA

Nitikang nasab ang mga adlaw
Padulong sa Paskohanong laraw
Ang kasadya sa matag palibot
Kay Pasko nga gayud masabot

Mga Paskohanong talan-awon
Inubanan sa awit na masanagon
Nagkalandrakas ang kolor sa siris
Ang kaanindot nila nga walay lalis

Ang mga parol nga gipangsab-ay
Sa matag bintana sa mga panimalay
Pun-an sa plastik na krismas tri
Na ang mga suga murag nagabayli

Ang mga tawo sa kadalanan nagasubwak
Mga pahiyom tam-is daw maanindot na bulak
Nagduotduot sa mga dagkong tindahan
Namili sa pangregalo para sa ilang tagaan

Kaanindot ang tanan nangandam sa Pasko
Puwera lang sa mga dili Kristiyano
Kay usab sila miduyog kanato ug mirespeto
Nagkahiusa bisag dili parehog pagtoo

Ang kalinaw, ang panaghiusa ug ang panagdait
Sa matag usag-usa kanato unta kini mopilit
Ang bugtong gugma unta maoy mopatigbabaw
Ug dili ang garbo ug prinsipyo nga taphaw

Pangitaon nato ang birtud sa pagpasaylo
Ning mga dughan ug dili ang dakong garbo
Dinha nato makita ang bugtong kalinaw
Matag usa kanato ang gugmang molutaw

Dili sad nato kalimtan kadtong mga kabus
Sa pagpaambit sa atong grasyang nahipos
Mao kini ang bugtong kahulogan sa Pasko
Ang gugma ug paghinatagay bisag way yamo

Bisan ang atong kinabuhi naapiki o hagip-ot
Magpasalamat kita sa Dios sa atong nakab-ot
Ang pagpailob ug ang pagsalig ngadto sa langit
Aron magdugang nato og igong kusog sa hingpit

Dili hunahunaon ang mga kalisod ug mga pagsulay
Kay mao ra kana ang magpugong sa atong kalipay
Hinunoa ang kalibutan nagatuyok ug may kausaban
Basin sa ugma damlag ang grasya moabot ug daghan

Magpadayon kita sa pag-ampo sa tiilan ni Bathala
Kay ang Iyang kalooy ug tabang kanato dili mawala
Ang akong mga Paskohanong pangandoy kaninyo
Ang kamaya, kalinaw, gugma ug kita moasinso

Tuesday, November 19, 2013

Ang Kaniadto

Ang Kaniadto
By Genamos_US of Washington DC, USA

Pagkaanindot pagahandumon
Ang mga nanglabayng panahon
Yano apan puno sa kalingawan
Gihandom kanunay ning dughan

Pagtungtong ko sa elementarya
Uso pa kaniadto ang mga baraha
Giimprenta ang mga matag salida
“The longest Day” ug mga “Ninja”

Mga lastiko, kasing ug mga tabanog
Pun-an sa eskoter na pagkaalingogngog
Magtubigtubig inig abot sa kagabhion
Magbato lata ug dyulen sa kabuntagon

Magtabisay ang among mga singot
Sa duwaduwa gayud kami nahimoot
Dili man haytek kaniadto apan lingaw
Kanako walay sayang nga mga adlaw

Kon dili man makatakyan ug makasyatong
Adto ra mi sa balili magbalintongbalintong
Way gubot ug saba ang palibot kaniadto
Minos ang mga balay ug dyip may esteryo

Dili kaayo mi magsuroysuroy bisag asa
Kay hadlok unya makasugat og paregla
Anha ra kami sa among dapit kasilinganan
Kay managkaila ra ug dali ra mi matoltulan

Matag kalye adunay iyang mga kapilya
May kaugalingong buwan magpiyesta
Magpaminaw kon asa ang bayle ug kombira
Kay aron mosayaw ug mokaon ang barkada

Malingaw ra mi sa ays kendi ug ays drap
Pun-an sa mga lamian na pan di maihap
May pan pransis, bahogbahog ug borikat
Pun-an sa init na shakoy ug botsi makalibat

Mga kinaham sa mga bugoy ug mga sipat
Kon matilawan mo ang kalami makakidhat
Magkatawa ta sa mga ngalan gipangpagya
Ambot karon kon aduna pa bay namaligya

Ay ang kaniadto, matam-is nga palandungon
Milabayng  panahon nahikalimtan na sugilanon
Gitagamtam ang matag gutling nga nahisubay
Sa hunahuna ko daw dili pa gyud kini dugay

Monday, November 18, 2013

Awhag Ko Kaninyo Da



Awhag Ko Kaninyo Da
By Genamos_US  of Washington DC, USA

Dili ko matugkad ang gibati kung kasobo
Ang kapait ug pagsulay kita nahidugmo
Walay luna nahimotangan ning dughan
Ang kasakit nasinati sa atong kaigsoonan

Ang katalagman miduaw sa atong nasod
Ang tanan mahikogang sa kadaut misulod
Labi na didto sa Leyte, Samar ug Sugbo
Apil na ang mga isla sa Palawan ug Iloilo

Daghan ang nakabsan sa ilang  mga kinabuhi
Way gipinig,  madato man o kabus way gipili
May mga nangawala hangtod karon gipangita
Kon buhi pa ba intawon sila nanghinaot makita

Mitulo ang akong mga luha sa kalooy miguwa
Ang kahapdos ning kasingkasing dili mawala
Sa mga bidyo ug piktyur nga akong nakita
Makaloloy silang tanan labi na ang mga bata

Ang kagutom ug kalisod ilang natagamtaman
Hilak ug bakho sa daplin intawon gitapigan
Nangindahay kanato nga ato silang tabangan
Tabang na kinasingkasing ug dili pagabayran

Midagsa ang mga kalibog ug dili ko masabot
Kon ngano dugay ang tabang kanila miabot
Daghan ang nawad-an og pasinsya na biktima
Kay ang dakong kalisod di na gyud maagwanta

Dili nato paaboton nga sa kagutom sila makalas
Dili nato dungagan ang ilang kapait ug kadimalas
Kaloy-an nato sila ug iapil sa atong mga pag-ampo
Nga kining tanan ilang malagpasan ug dili modako

Ato na balang itugyan sa goberno ang tanan?
Bisan hinay ang pagrespondar sa mga kakulian
Sama niining kalamidad nga atong nahiaguman
Dili kita andam ug kulang sa sistema gipatuman

Bisag naghugno kining atong mga kasingkasing
Mga pagmahay sa kinabuhi ato nalang ipatapsing
Kay mosamot kahoot ning atong mga dughan
Sa walay lami na politika sa nasod pagahisgotan

Dili ko nalang kini tas-on ang balak kung gisulat
Sa pagtuki sa mga way laming nangagi ug buhat
Kay ang akong tumong  mao ang mga nabiktima
Na sa karon nanginahanglan kanato sa tabang ta

Ang mga nabiktima hatagan nato silag importansya
Ning atong mga dughan ug tagsatagsa ka mga bulsa
Nanghinaot na dili kita magtubili sa pagtabang kanila
Kay dili kabayran og salapi ang ilang kalisod na gidala

Monday, October 28, 2013

Ang Paghandom Sa Mga Mitaliwan

Ang Paghandom Sa Mga Mitaliwan
By Genamos_US of Washington DC, USA

Matag Nobyembre 2 atong kining gisaulog
Ang adlaw sa mga kalag kita nagpatighog
Ang paghandom sa mga nangamatay
Ang mga kalag sa dugay nang mipahulay

Bisag wala na sila niining kalibutan
Tipik gihapon sila ning mga dughan
Timaan sa atong paghigugma kanila
Ug paghatag og igong importansya

Ang pagduaw sa ilang mga lubnganan
Ang pagdagkot og kandila sa pagtimaan
Ang paglitok og pipila ka mga pag-ampo
Bisag hamobo apan kinasingkasing dako

Ang pag-andam ug paghalad og mga pagkaon
Labi na kini paborito sa namatay pagaandamon
Pagasawhan kini sa tibook pamilya
Human sa pagpangadye sa nobena

Daw kini usa ka tradisyon sa katolisismo
Gisunod sa mga katoliko sukad pa kaniadto
Giaghat kita sa pagtambong sa tulo ka mga misa
Alang sa mga namatay, kaparian ug santo papa

Pipila lang kini sa atong mga naandan
Sa atong pamilya ug sa mga katigulangan
Ang paghatag kanila og respeto o pagtahod
Sa atong mga indibidwal na pagtuo gisunod

Nagkalainlain man ang mga ritwal na gitamod
Sa relihosong aspeto ug kaugalingon kita gitulod
Ang katuyoan niining tanan kay ang paghandom
Sa kinabuhi kaniadto sa namatay tam-is o aslom

Kon asa man kaha sila karon gibutang sa Ginoo
Nanghinaot ang ilang mga kalag wala napasmo
Sa mga grasya ug kalooy sa Dios sila gipasaylo
Aron ikauban nila ang mga angel ug mga santo

Wednesday, October 9, 2013

Ang Litson

Ang Litson
By Genamos_US of Washington DC, USA

Nag-ubo ang baboy
Sa guod nagtaroy
Nagsinaw ang simod
Ang lawas gatuy-od

Gilamasan ug giasinan
Aron mahimong lamian
Ang lawas gihaplasan
Sa patis na gamhanan

Daghan ang mag-atang
Ang kahumot makabuang
Sud-an na dili mabalibaran
Kon iandam ug sumsuman

Sa mga piyesta ug kombira
Halinon gayud ni siya
Unang sud-an mahurot
Sa mga gigutom di kalusot

Ang kubal pagkakagumkom
Mga nagkaon nagpahiyom
Gitambalan sa ilang kaibog
Pun-an sa tuba makahubog

Lami isawsaw sa pinakurat
Pus-an ug sili makapugwat
Kalas kaayog puso ug kan-on
Kay lami-an intawon ang litson

Kon man gani dili mahurot
Paksiwon ug pritohon esyot
Apan magbantaybantay kita
Sa adunay alta-presyon gidala

Basin intawon kita madisgrasya
Sa laming pagkaon kita madala
Hinayhinay lang ug dili tantong sobra
Labi na sa karne nga puno sa protina

Gipahinungod ko kining balak
Gisulat ko dinhi sa akong lawak
Ang piyesta sa Talisay sa Sugbo
Ang litson didto akong ipasigarbo

Tuesday, July 30, 2013

Ang Panuhot

Ang Panuhot
By Genamos_US of Washington DC, USA

Naglain ang iyang kabuhi
Sa lawas niya gipamati
Ang dagway nag-aslom
Ang sakit iyang giluom

Naglingkod lang sa daplin
Ang haplas iyang gitak-in
Gisakitan sa iyang tiyan
Sa panuhot siya nadak-an

Gipaningot og bugnaw
Nangluspad og gitugnaw
Sa dili masabot na gibati
Pun-an sa otot nagpitipiti

Galuya ang iyang lawas
Ang adlaw niya gidimalas
Gapawpawng ang panan-aw
Mga mata nagsiga nagtuaw

Galaylay ang iyang abaga
Ang kagutom giagwanta
Namognaw ang mga kamot
Apil ang lapa-lapa gipaningot

Dili lalim kining panuhot
Daghan ang naglagot
Napasaran sa gutom o dili
Sa pagkaon kita dili mamili

Ihigop lang sa init na sabaw
Apil ang bugnawng bahaw
Dili kalimtan ang pamahaw
Aron halayo kita sa kakuyaw

Kay ang panuhot dili magsaba
Ang kalisod kusog pa sa baha
Busa ang lawas paga-ampingan
Kay mao ra ang atong puhonan

Sunday, July 28, 2013

Si Toro, Ako Ug Ang Kahaponon

Si Toro, Ako Ug Ang Kahaponon
By Genamos_US of Washington DC, USA

Pagkainit gayud ning among dapit
Si haring adlaw kanamo nanghagit
Ang analisngaw sa yuta nagsyaagit
Ang among mga singot pagkapilit

Kutas paminawon ang tumang kainit
Kay panahon na gayud sa ting-init
Ang bugnawng tubig lang ang maidalit
Sa lawas makatagbaw na dili mapalit

Mingaw na kaayo ang mga kabukiran
Dili susama na sayo pa ang adlawan
Mabugnaw na huyohoy ang kasagaran
Akong paminaw dili tanto kita kutasan

Ang pughawng langit nindot tan-awon
Mga panganod nahinanok sa katulogon
Panan-aw gianod sa kapunawpunawan
Nagkalandrakas na kolor siya gihabolan

Nindot unta kon ang hangin mabugnawon
Apan lagi dili susama kaniadtong panahon
Gipaabot ko ang paglandong sa kahaponon
Aron tiwason ang naundang kung bulohaton

Mipahulay mi ilawom sa punoan sa mangga
Kuyog ang kinakusgan kung kabaw nagluya
Si Toro miligid ug mipahulay wala kaagwanta
Ug ako nanghuyatid ug gipiyong ang mga mata

Samtang gipaminaw ang mga kinanaas sa palibot
Ang mga bulak ug tanaman nangalisbo sa kahumot
Nalingaw ako sa mga simponiya sa kalanggaman
Ang tingog sa gangis ug ang taghoy sa tanaman

Maayo gani nagsul-ob ko og kamisin ug purontong
Matod pa ni Noy Teban mura kuno kog nakalugsong
Kay hayahay ang gipamati murag bugnawng erkon
Na ang atong bugan ug ilok dili tantong panington

Simple lang ang kinabuhi dinhi sa probinsya
Halayo sa mga alingogngog sa mga pabrika
Lab-as pa ang hangin sa kanunayng mahanggap
Ug lagyo ra ang mga silingan ug sa tudlo maihap

Friday, July 26, 2013

Gihubagan

Gihubagan
By Genamos_US of Washington DC, USA

Ngano si Dodong nagtakiang?
Kon tan-awon murag napiang
Naglisod siya sa paglihoklihok
Ang nawong murag nahadlok

Giduol ko siya ug gipangutana
Ang kalisod murag giagwanta
May hubag kuno siya sa bugan
Murag sa humigas na pinaakan

Kun imong tanawon siya molakaw
Daw gibunalan sa bugoy na opaw
Motakingking daw murag nagharag
Kay gisakitan diay sa iyang hubag

Nagsugod kuno sa gamayng katol
Inubanan na gamayng kangolngol
Gitambalan sa ambularyo og ityol
Apan sa sakit gihapon siya gihasol

Mga istambay siya gibugalbugalan
Kay mura daw siya og napus-an
Ang sakit na dili daw kabayran
Puno sa kahasol nga hilabihan

Ako siyang gitambagan sa hilom
Basin maimpiksyon siya molagom
Makigkita siya og doktor sa ospital
Basin antibiotic lang ang itambal

Ang hubag ug sakit dili gayud ibaliwala
Sa lawas kanunay kitang magpabakana
Ang himsog na kinabuhi ang atong alas
Aron mahilayo kita kanunay sa dimalas

Thursday, July 25, 2013

Ang Tambag Ni Ingko Eking

Ang Tambag Ni Ingko Eking
By Genamos_US of Washington DC, USA

Ang kinabuhi sa tawo daghan og dagway
Nakigharong sa mga suliran ug pagsulay
Gibuhat ang tanan aron walay magmahay
Gipaningkamotan kab-oton ang  kalipay

Ang kalibutan naputos sa mga lingla
Sa atong mga kahigalaan ug pamilya
Walay gipinig kon asa kita ibanlas
Sa mga kasakit ug kalipay kita itipas

May mga panahon sap-ongan atong mga mata
Apil ang atong kasingkasing na pahilumon kita
Basin tungod sa gugma o kalooy ang hinongdan
Kay ang sayop himoon man og insakto sa uban

Kini ang hagit sa kinabuhi kitang gipuy-an
Nagkalainlain mga solusyon atong sulayan
Mga tambag sa atong pamilya o suod sundon
Kon mahitugma ba kini sa atong sitwasyon

Apan lagi kining tanan anaa ra gayud nato
Ang pinal na desisyon kon unsa atong iduso
Timbangtimbangon gayud ang matag lakang
Ug buksan ang hunahuna bisan kini kimpang

Ang tanang suliran adunay kasulbaran
Ang pagpailob ang atong pagahuptan
Ang paglaum ug hugothugot na pagtoo
Sa kaugalingon ug sa Dios kita mahaylo

Ang pag-ampo nato kanunay ngadto sa langit
Aron mga suliran dali ra mahanaw inig sampit
Ang kalinaw sa hunahuna ug kalipay mouban
Aron ang sakit sa dughan dili kita mahidutlan

Mentras buhi pa ta sa ibabaw ning kalibutan
Mga pagsulay, kasakit ug kalipay kita giubanan
Kay anino man gayud sa kinabuhi ang mag-antos
Ang pagsakripisyo ug pailob aron kita masantos

Busa magpadayon kita sa pagpakabuhi
Bisan sa panahon kita kanunay nagpuliki
Ang disiplina ug pagpaningkamot ang hinagiban
Aron ang kinabuhi lanoy og may igong padulngan

Thursday, July 11, 2013

Ako Ug Ang Buwan

Ako Ug Ang Buwan
By Genamos_US of Washington DC, USA

Ang alindong nagkatawa sa langit
Ang kalibutan naputos sa kangitngit
Naghatag og dan-ag sa kagabhion
Ang kahayag niya nga talagsaon

Ang panagway sa mga bata madasigon
Nagtan-aw kaniya uban ang mga bitoon
Ang iyang gilak nagtimaan siya magarbohon
Kay kidhatan sa mga bitoon na mga garaon

Gibalik ko pagtan-aw ang akong kabataan
Magduwaduwa og tubigtubig sa tugkaran
Magtagotago mao sad ang among kalingawan
Kay hayag lagi ang kalibutan gumikan sa buwan

Apan dili tanan ang nalipay kon buwanon
Labi na ang mga mananagat ang pasultion
Mingaw ang lawod sa mga isda na kuhaon
Magsud-an nalang intawon sila og kinason

Kon wa ang buwan ang kalibutan masulob-on
Kay di kita makasinati kon unsa ang kagabhion
Puro lang adlawan ang atong pagatan-awon
Way pagtaob ug maghunas sa dagat subayon

Nindot ang kalibutan kay balansi ang tanan
May pagsubang ug pagkasalop sa adlawan
Gasa gihatag sa Dios kanatong mga katawhan
Ang kinabuhi susama sa adlaw ug ang buwan

Nagkalainlain man ang atong mga opinyon
May mga nalingaw ug nagbagolbol intawon
Ang dan-ag sa buwan nga nindot tan-awon
Inubanan sa bugnaw ug hilom na kagabhion

Wednesday, July 3, 2013

Ang Gilangaw Na Gugma

Ang Gilangaw Na Gugma
By Genamos_US of Washington DC, USA

Pastilan gayud si Dodong naglakaw
Minghoy ang dagway nanghupaw
Lawom ang pangisip daw giuhaw
Sa mga pangutana murag nahilaw

Walay tumong ang iyang paglakaw
Kon asa gianod ang iyang panan-aw
Murag ang dughan naagian og huwaw
Kay sa gugma kuno siya gisurambaw

Si Inday kuno milakaw sa way pananghid
Kon may laing Dodong ba ang nakasaghid
Mga pasumbingay sa iyang hunahuna
Mga kabalaka ug tubag kaniya gipangita

Nagkaupos na ang kainit sa kahaponon
Walay imahe ni Inday ang nagpaingon
Ang kamingaw sa gibati nga talagsaon
Mga luha midagayday puno sa sugilanon

Nahunlak ang mga gipangandoy ug damgo
Si Dodong  gilangaw  nga wala siya makatuo
Sa gidangatan niyang kasakit ug pagsulay
Nanghinaot nga temporaryo ug molabay

Miabot  na ang panagway sa kagabhion
Tingog sa gangis ug mangliw masulob-on
Miduyog ang dagway sa buwan ug bitoon
Ang nahigwaos nga dughan dili gayud sayon

Ang kalooy ang nagpasulabi sa kagabhion
Ang pagpailob ug pagsabot maoy tukion
Ang tanan adunay kinutoban ning kalibutan
Ang kinabuhi magpadayon dili ang katapusan

Hatagan gamay og panahon sa pagbangon
Sa pagkadugmo sa yuta dili kini pagaisipon
Usa lamang kini sa mga hagit sa kinabuhi
Matag usa kanato may kapalaran kitang gipili

Tuesday, July 2, 2013

Gikapoy Ug Gilaay

Gikapoy Ug Gilaay
By Genamos_US of Washington DC, USA

Gilaay ako karong adlawa
Gikapoy na wala ko tuyoa
Maghigdahigda sa kama
Sa kakapoy na dili madala

Basin maminaw akog sonata
O Kon dili maminaw og drama
Buhian ko ang mga kabalaka
Kay ang kakapoy giagwanta

Kon adunay manawag pasinsiya
Kay di nako tubagon bisag kinsa
Magbilin lang siya og mensahi
Kon kaniya murag importante

Daw miduyog ang kalangitan
Si Haring adlaw na gimug-otan
Sa mga panganod nga nakuratan
Kay gibundakan sa dakong uwan

Kaon ug katulog lang pagabuhaton
Kining adlaw kanako nga talagsaon
Biyaan usa nako ang mga bulohaton
Ug kalimtan ang mga kabudlay karon

Gusto unta ko mag-eksersays
Ganiha unta tong pagkaala sais
Apan wala ko kasayo og mata
Kay gihawiran sa akong kama

Gihuyatid ko ang mga tiil ug kamot
Nagpaminaw sa kamingaw sa palibot
Gihunahuna ang pamahaw na humot
Kon unsay isud-an sa bahaw kung dukot

Wednesday, June 26, 2013

Ang Gugma Ug Ang Kinabuhi

Ang Gugma Ug Ang Kinabuhi
By Genamos_US of Washington DC, USA

Daghan ako og mga pangutana
Kabahin aning gitawag na gugma
Daghan nangahungog ug nabuta
Sa ilang mga pagbati nga gidala

Mga suliran ug mga kapakyasan
Aduna usab misangko sa kadaugan
Ang mga drama nadungog sa radyo
Nakabasi kini sa tinuod na mga tawo

Dili kini tumotumo o sa imahinasyon
Sa hunahuna namugna ang sugilanon
Ang kinabuhi sa matag adlawng nakita
Ang kausaban puwede kita og ibaligya

Matag tikang sa orasan niining kalibutan
Matag gutlo niini adunay igong hinungdan
Ang kalibutan napuno sa mga kalingawan
Napuno usab sa mga pagsuway ug tinuyoan

Way gipili ang gugma sukad pa kaniadto
Bisan pa ania na sa panahon sa moderno
Ang dagway sa gugma walay pagkausab
Magdepende sa gibati sa mga manag-uyab

Daghan ang naingganyo nga ilang tugkaron
Kon unsa kalawom ang gugmang solundon
Di ba nagkalainlain ang mga interpretasyon?
Apan usa ra ang hinungdan ug dili kini sayon

Matanghaga gayud ang kinabuhi sa tawo
Lisod madupa ang uyok sa atong pagkatawo
May igong pangisip ug pagbati lahi sa uban
Gihatag sa langit aron atong paga-ampingan

Ang gugmang gibati dili pagaduwaduawan
Anino sa kasakit ug kapait  sa nahingtungdan
Mga kasingkasing gikomotkomot sa mga luha
Gumikan sa gugmang maluibon ug na dismaya

Dili kita magpasagad sa atong mga gipangbati
Dili magdali og hasmag sa gugmang masinati
Kini pagahunahunaon ug timbangtimbangon
Kay ang tinood na gugma tam-is ug mabulokon

Sunday, June 2, 2013

Ang Bulak

Ang Bulak
By Genamos_US of Washington DC, USA

Pagkaanindot nga pulong litokon
Ang tingog sa kinaiyahan madanihon
Sama sa usa ka bitoon sa langit
Madalidali ra nato og mapalit

Sa tibook tuig ato siyang makita
Bisan unsang okasyon gipangita
Labi na sa adlaw sa mga kasingkasing
Sa mga nakadawat murag mapraning

Gasa sa kahitas-an sama sa bulawan
Mabulokon ang dagway sa kalibutan
Sund-onga ang kabukiran kon wala
Sama ra kini nawad-an og himaya

Mga alibangbang, buyog ug kalanggaman
Masadyaon nagtan-aw sa mga halaman
Nagkalainlain man ang ilang mga kolor
Nindot iadorno sa ibabaw sa aparador

Mga rosas ug sampaguita pagkahumot
Ang katam-is nangalimyon dili mahurot
Mga kapatagan ug kabukiran gikoloran
Sa mga kabulakan nga nindot ilarawan

Dili tanang bulak magpabilin nga bulak
Ang uban mahimong prutas di kini bakak
Depende kini sa klase sa bulak na gitanom
Gipakita lang sa Dios kun unsa iyang gahom

Ang bulak usa sa mga gibuhat sa Dios
Atong pagaampingan na maoy ibalos
Sa ilang mga kolor adunay  mga kahulogan
Gugma, kalinaw, paglaum ug kaangayan

Bulak pagkaanindot nimong sud-ongon
Ang katahom adunay gayud sugilanon
Matag nilalang adunay mga katuyoan
Kay kini ang sinugatan natong tanan

Saturday, June 1, 2013

Ang Alibangbang

Ang Alibangbang
By Genamos_US of Washington DC, USA

Ang inahan nga alibangbang milupad
Sa mabagang tanaman siya gipadpad
Aron ang mga itlog iya kining ilatad
Kay sugo sa kinaiyahan iyang gisaad

Inig kapusa ang mga til-as manimpalad
Nagkalandrakas na kolor ang gihalad
May mga tunokon, niwang ug tambokon
Managkapyot sa mga sanga ug dahon

Apan sa pag-abot sa iyang pagkalinghod
Mga dahon ang pagkaon wa siya maglisod
Ang dahon maoy iyang himoong bayanan
Aron didto mopasilong ug iyang kapuy-an

Sa iyang pagsuroy-suroy siya makatulog
Sa kakapoy siya mahinanok na busog
Ilawom sa layang dahon siya mopasilong
Nakumbitay sa sanga nga sama gilubong

Pipila ka mga adlaw o semana ang molabay
Ang til-as mahimong alibangbang na gamay
Mangimbisog molupad na puno sa kalipay
Aron usisahon ang kalibutan siya mosuway

Sa mga hardin ug kabulakan siya mopanaw
Mangita sa mga dugos na iyang ipamahaw
Yano ra ang kinabuhi sa usa ka alibangbang
Hamobo ang kinabuhi apan wa siya malisang

Friday, May 31, 2013

Ang Gugmang Nahinumduman

Ang Gugmang Nahinumduman
By Genamos_US of Washington DC, USA

Sama sa naandan mga ordinaryong adlaw
Sa balay ug opisina lang ako magalakaw
Motrabaho sa Lunes hangtod Biyernes
Sakay ug kanaog madaghan nga beses

Mga inandan nga lihok lisod gyud malugtas
Kay naanad na ako nag-inusara nagbaktas
Ang kamingaw nabatyagan sa dughan gibati
Gihandom ko ang milabayng katuigan nasinati

Mga kanhing handumanan kanako nagpabilin
Ug sa hunahuna nagduwaduwa may pakapin
Matag adlaw nakighagwa sa idlas na kapalaran
Nagpaalim sa dughan samaran ug gisakitan

Madugay pa siguro ko siya mahikalimtan
Sumala ning kasingkasing kung gihilantan
Nagsunodsunod ning kinabuhi nasum-okan
Na siya kanunay nagpabililin ning dughan

Mahinumdom ako sa kaniadto nga kami pa
Matag Dominggo manuroy kami bisag asa
Manan-aw kami og sine ug sa parke manuroy
Puno sa kalingawan nga dili makaminghoy

Walay mga adlaw nga dili ko siya mahinabi
Bisag unsang mga estorya wala kami gipili
Mga komedya ug inadlaw nga panginabuhi
Mga katawa ug pasiaw kami nahimoot gisukli

Karon, bunga nalang kini sa usa ka sugilanon
Nalun-as ug nahanaw ang dughan na balaanon
Nahubsan sa iyang katam-is pag-agi sa panahon
Ug gidawat ang kaparutan sa gugmang naulipon

Thursday, May 23, 2013

Ang Pagpakabana, Katungod, Soberanya Ug Hustisya

Ang Pagpakabana, Katungod, Soberanya Ug Hustisya
By Genamos_US of Washington DC, USA

Dili pa lang dugay may insidenteng naukay
Ang langyawng insek na mananagat gipatay
Giakosahan nakalapas ug wala kuno misubay
Sa langyawng lagda sa kadagatan nga gihan-ay

Gipasanginlan ang atong mga bagani sa kadagatan
Gipatay kuno ang insek nga walay igong basihan
Wala kuno nakalapas ang ilang mga katawhan
Sa Soberanya sa atong nasod na gipanalipdan

Ang dagat lisod bantayan kon utlanan ang hisgotan
Walay mohon nga makita na susama sa kayutaan
Apan adunay mga mananagat na mapahimoslanon
Kon walay nagbantay mga ilegal panagat buhaton

Nangatarungan ang isig habig sa ilang mga pasangil
Way mahagdaw na kaayohan kon kinsa ang maningil
Mga panginabuhian sigurado gayud nga maapektohan
Pun-an sa kahadlok kon basin ang kasamok mabatyagan

Dali ra kini masabotsabotan kon ang tanan magkahiusa
Kahibalong morespeto sa balaod sa nasod ug soberanya
Ang makighoyhoy sa ilang mga kasikbit nga kasilinganan
Dili ang pagpanghadlok o pagpanghasi ang ilang hinagiban

Kon atong basihan ang mga niaging kasaysayan sa kalibutan
Ang mga panagbangi sa ilang mga nasodnong yuta o utlanan
Kalagmitan kanila ang mga kabus nga nasod maoy pareglahan
Sa mga adunahan o gamhanan nga nasod, sila maoy matuman

Sukad pa kaniadto, ang Pilipinas may abunda na suplay
Sa natural ug tawhanon nga bahandi na atong gikalipay
Apan lagi ang mga langyawng negosyante ang nakapahimolos
Ang resulta ang atong nasod naglisod ug kita sa utang nalumos

Daghan nang milabay na mga namuno sa atong nasod
Ang suliran sa teritoryo gipasipad-an sama kita gitisod
Walay gibuhat kon aduna man gani kini taphaw man lang
Kay giuna ang ilang mga personal nga bulsa ug kabo-ang

Sayonsayonon ra kita niining mga adunahan nga nasod
Kay ang mga Pilipino wala nagkahiusa ug sila nasayod
Sa atong mga baroganan nga mausabon ug magpalingpaling
Haylohon kita og salapi aron mahiduol sa atong kasingkasing

Kalim-an nga tuig ang milabay ang Pilipinas mauswagon
Sa ekonomiya ug pananalapi na puno sa mga sugilanon
Daghan ang mga nasina labi na sa mga nasod sa Asya
Kay ang atong panagamhanan kuno maayo pagkadala

Apan dili naman nato mabalik ang kamot sa panahon
Ang atong nasod ug ang atong kinabuhi magpadayon
Bisag hagip-ot, mga kalisod molabay atong subangon
Ubanan sa mga pag-ampo aron ang kalinaw maangkon

Friday, May 17, 2013

Paghuman Sa Piniliay, Asa Man Ta Paingon?

Paghuman Sa Piniliay, Asa Man Ta Paingon?
By Genamos_US of Washington DC, USA

Karon kay nahuman naman ang piniliay
Daghan ang nahuwasan sa ilang kabudlay
Mga kandidato nga midaog nagkiaykiay
Uban ang ilang dumadapig puno sa kalipay

Daghan usab mga kandidato nangaminghoy
Ang kaparutan sa ilang mga gidamgo napusoy
Pun-an pa sa nagastos sa piniliay nagpanaghoy
Kun kanus-a mabawi nila kadtong pundo gilamoy

Kon napildi man sila sa paglansar sa eleksyon karon
Magpailob usa kay dili pa ang ilang tukmang panahon
Kon may programang nasugdan ila kining ipadayon
Aron ang pagsalig sa mga katawhan ilang pahinogon

Hapsay kuno karon ang piniliayng milabay
Kay gamay ra kuno ang porsento ang gipatay
Dili kuno pareho sa mga miaging eleksyon
Mga kagubot ug kaguliyang ang naangkon

Gumikan kini kay daghan nang nagpakabana
Sa atong nasod ug sa gobernong nagdumala 
Ang mga pagsalig sa katawhan karon dako
Dala nila ang paglaum ug ting-usabawan giduso

Mao na ba kini ang tubag sa atong mga pag-ampo?
Tingale kon nakita nato ang pag-uswag sa pagpuyo
Gumikan sa atong kakugi ug pagpaningkamot
Pun-an sa mga pagsalig sa goberno kita nahimoot

Nindot kini nga tilimad-on na kanatong tanan
Hinaot pa ang kalisod sa atong nasod maibanan
Magkahiusa ang mga kabus ug ang mga adunahan
Sa ilang mga intereses sa kinabuhi may kausaban

Dili sayon ang magsubay sa matarong nga dalan
Kon wala kitay pagsalig ngadto sa kahitas-an
Dali ra kitang haylohon sa tentasyon giubanan
Kay ang kalibutan gialirungan man sa mga dautan

Dili nato husgahan ang mga karaan nga midaog
Sa ilang nadag-an na posisyon wa gyud matarog
Kay basin sad sila tinood gituboy sa mga katawhan
Gumikan sa ilang nabuhat na maayo sa katilingban

Ug sa kadtong mga bag-ong tubo nga mga natudlo
Hinaot ang tinood na pangserbisyo sila dili dalo
May prinsipyo ug sinsero sa ilang gipanumpaan
May kahadlok sa Dios ug nahigugma sa katawhan

Matag usa kanato adunay papel ning katilingban
Ang pagbuhat kanunay sa maayong panag-ingnan
Maggikan kini sa atong kaugalingon ang kausaban
Aron ang kinabuhi hapsay ug puno sa kalamposan

Thursday, February 21, 2013

Puto Sikwate Ni Kuya Tiboy

Puto Sikwate Ni Kuya Tiboy
(Jeffrey Astillo – Anchorman DYAB (CEBU))
By Genamos_US  of Washington DC, USA

Pagkalami sa sayong kabuntagon
Ang kalagsik sa lawas among bation
Matag buntag kami iyang pukawon
Sa tingog ni Kuya Tiboy na siawon

Ang iyang programa makadasig
Sa among kasingkasing moparayeg
Ang Puto Sikwate ang iyang idalit
Kanamong tanan ang iyang isampit

Mga katawa, balita ug mga pasiaw
Timaan ang programang makalingaw
Pamukaw sa kapamilyang molakaw
Aron dili maulahi sa ilang mga lakaw

Mga pagtimbaya sa mga kahigalaan
Sa lokal ug sa gawas nasod gihalaran
Pun-an pa sa mga kanta ni Kuya Tiboy
Mga tigpaminaw gilamian nagpanaghoy

Kung siya mokanta sa usa ka sonata
Sa mabugnawng tingog kami gidala
Matud nila, Esmol bat tiribol kuno ni siya
Kay sa lamyos niyang tingog pagkanindota

Bisag usa ra ka oras ang iyang programa
Daghan tang makat-onan dinha kaniya
Mga tambag sa kinabuhi ug sa panglawas
Gipaambit sa kahanginan ug sa tagagawas

Among giampo ngadto sa kahitas-an
Ang programa ni Kuya Tiboy buligan
Sa mga grasya uban ang estasyonan
Sa paghatag serbisyo namong tanan

Busa magpadayon kami sa pagsunod
Sa programa ni Kuya Tiboy na matuod
Tabang ug kalingawan kanamong tanan
Ang kalipay ug kasadya among natilawan

Monday, February 18, 2013

Ang Gugmang Nalawos Apan Nabuhi

Ang Gugmang Nalawos Apan Nabuhi
By Genamos_US of Washington DC, USA

Ambot kung tinuod ba gayud ning gugma
Labi na sa kanhing gugma ako nalingla
Ang kahapdos sa dughan ang napanag-iya
Napuno lang sa luha ug kasub-anan gidala

Matud nila, daghan ang nanimpalad sa gugma
Kay ang kalibutan kuno napuno sa romansa
Tam-is kuno ang gugma murag asukar ug tabliya
Kung sagulon ang duha syur masikwate gyud kita

Ato nalang gayud ning ikatawa ang gugma
Kasakit ug kalipay atong ilingawlingaw ta
Magmatngon gayud kita aron dili madisgrasya
Sa gugma adunay mga mata apan kini makabuta

Apan lagi kon ngano ako gibulagan niya
Mga tubag nagdala ug ganti ug pangutana
Way lami kon maglakaw kita mag-inusara
Sa dalan ang nawong nato pagkaminghoya

Wala gayud ako gisuwerte sa gugma
Mga kaguol lang sa dughan maanaa
Sa kalibutan daghan og kompetinsya
Ang kapakyasan sa dughan giagwanta

Apan sa tanto kung paglibotlibot
Nakaplagan ko ang gugmang nindot
Ang kapalaran kanako misimhot
Ang dughan ko nasad mipaghot

Ang kalibutan karon bisag alimoot
Ang kasingkasing ko gipaningot
Kay mikitib ang gugmang milosot
Gumikan kaniya sa iyang pag-abot

Siya ang mahinungdanon dinhi kanako
Sama sa tubig, imnon ug sa tanom ibubo
Sa kanhing gugma nalawos inanay midako
Kay ang gugma niya tam-is ug dili dawo

Giluwas niya ang akong kinabuhi
Sa pagkadagma sa gugmang bati
Giagak niya ako sa pagbarog pag-usab
Aron pagahuptan ang gugmang nagdilaab

Ilawom ning dughan ang kasuko nawala
Sa kanhing gugmang nalun-as ug mibiya
Miabot kanako sama sa dakong kometa
Natagak sa langit ug ako ang nakapanag-iya

Ang gibating kalipay dili gayud kabayran
Dili kabilhan ang gugma sama sa bulawan
Pagaampingan, pagsilbihan ug dili pasakitan
Kay ang gugma sagrado gikan sa kahitas-an

Sunday, February 17, 2013

Lingawlingaw Sa Hunahuna

Lingawlingaw Sa Hunahuna
By Genamos_US of Washington DC, USA

Inday sa akong hunahuna
Ang dughan ko pagkabanha
Ang imahe mo dili mawala
Sa imahinasyon nagduwaduwa

Matag gabii ikaw ang gidamgo
Sa imong katahum ako gihaylo
Mga pahiyom mo dili ikabaylo
Ang dughan ko sa langit misaylo

Gusto ko lang ikaw ikauban
Maglambiyong  sa kalibutan
Layagon ta ang mga kadagatan
Aron ang gugma ta pagasaw-an

Susama sa nobela kung nabasa
Ang sugilanon napuno sa romansa
Mga pagsulay  gihagit ang gugma
Gumikan sa gibati nga pagkalamia

Wala gayud ako masayop
Ning hunahuna kung maaghop
Ang gugma nga mihangop
Sa kasingkasing ko mitaop

Gugma na ba kini matawag?
Ang dughan ko ang nagsabwag
Ang tingog sa gugma mitawag
Gilumay kanimo nagbaragbarag

Dili kuno ta ganahan mokaon
Bisag litson ang sud-an dili matulon
Hunahuna naglatagaw gibalon
Ang kamingaw sa kahaponon

Pagkaaligre gayud kung matinood
Mahilantan ang dughan maglisod
Kon kinsa kana si Inday naglingkod
Naghulat ni Dodong nakamatikod

Adunay gamayng panulti-on
Ang gugma kanato sulondon
Pagaampingan ug amomahon
Aron ang tawo magmalipayon

Lingawlingaw na dala ang tinood
Ning kahaponon kanako misulod
Nagpaingon ang kagabhion gitulod
Milakaw ang adlaw  nga nangluod

Friday, February 15, 2013

Ang Piniliay 2013, Aduna Pa Bay Paglaum Mapaabot?

Ang Piniliay 2013, Aduna Pa Bay Paglaum Mapaabot?
By Genamos_US  of Washington DC, USA

Gibuksan na sa COMELEC ang pagpangumpanya
Sa tanan modagan na mga kandidato nakalinya
Na karong umaabot na Mayo 13 karong tuiga
Sa lokal ug nasodnong panagamhanan pillion ta

Ang nasodnong bugnong lugaynon nga init pa sa kape
Mga midagan nga kandidato sa mga tawo nagpabyuti
Nangindahay sa mga katawhan na ayaw daw sila kalimti
Nagpakilooy intawon piksan sa mga botos sa mga botante

Ang tibook nasod naukay sama nga adunay nagpiyesta
Nangumpanya sa ilang kandidato aron mahiapil og lista
Bisan asang sook suroyon aron mailhan apil na ang iglesya
Matag dumadapig napuno sa talagsaong kadasig ug abiba

May mga tawo miboluntaryo ug sa trabaho miundang
Gibayran dako sa kandidato aron mangumpanya nalang
May mga gipasaligan sa mga kandidato nga sila tabangan
Kon modaug kuno siya ang kadaghanan kanila mabulahan

Mga pasalig makapasiga og mata ug nagdala og paglaum
Labi nga gayud ang ilang plata porma sa katawhan isumsom
Apan lagi inig kadaug nila ang uban dili na modumdom
Ug kalimtan nalang ang mga gipangsalig ug magpakahilom

Matod pa sa uban na mga siaw, ang Pilipinas lahi
Kon ang kandidato kuwartahan hayan gyud mapili
Ang kuwarta kuno kanila ang gamhanan sa tanan
Kay mapalit nila ang mga botos sa mga katawhan

Hugaw ug samok  ang atong eleksyon dinhi sa nasod
Kon tikas ug pinalitay sa botos magpadayon mosulod
Mao kini ang namat-an ug naandan sukad pa kaniadto
Ang mga adunahan midagan aduna gayud silay liderato

Pagkasakit palandungon ang atong nasod gitiawtiawan
Asa man kutob kining mga kaguliyang ug mga kalisdanan?
May mapaabot pa bang kahayag motumaw ug matilawan
Ning atong nasod ug sa politika permi lang giduwaduwaan

Asa naman kadtong mga ginadamgo ug gipangandoy?
Inig labay sa panahon mogahi sama sa pinutol na kahoy
Mao nalang ba kini ang talan-awon matag eleksyon iasoy
Na walay kausaban ang dagan sa nasod permi lang pusoy

Busa kitang mga katawhan magmata ug magkahiusa
Sa atong tumong sa pagpili sa maayo ug kon kinsa kanila
Pilion ang tiunay nga moserbesyo ug diniyos modumala
Aron kita ug ang atong nasod may mapaabot pang ugma

Thursday, February 14, 2013

Ang Kinabuhi Usahay Dili Makiangayon

Ang Kinabuhi Usahay Dili Makiangayon
By Genamos_US of Washington DC, USA

Nahibalo ako nga aduna kanay lain
Mao diay ang gugma mo nabalhin
Gipaambit mo sa uban maong nahalin
Gibiyaan mo ako ug ang gugma nabahin

Ang mga lihok mo kanako nausab
Kon ngano ang dughan mo nanghuy-ab
Imo na akong gikalimtan sa hangtod
Kay kadtong gugma mo diay dili matuod

Sa mga nanglabay nga mga adlaw
Ang halok ug gakos mo kanako bugnaw
Mihupas ang kainit uban sa imong paglakaw
Apan ang gugma ko kanimo magpabilin labaw

Wala nay lain sa akong hunahuna kon di ikaw
Mga handumanan ta gitapigan aron dili mohungaw
Bisan og wala kana, gugma ko di gayud mabahaw
Gipaambit ko kanimo ang tanan ug ikaw nahibaw

Kung ngano imo pa man taguon ang sekreto
Di ba puwede kung imo kung sultian og diretso
Tingali masabtan ko ikaw ug atong masabutan
Aron luwason ang naluyang pagbati ug gisakitan

Ang panahon nalang ang atong paga-agdon
Ang pagkalimot kanimo dili gayud masayon
Dawaton ang kamatuoran aron magpadayon
Kay ang kinabuhi usahay dili makiangayon

Friday, February 8, 2013

Ang Estudyante, Bidyo ug Ang Unibersidad (Dili Pa Ulahi Ang Tanan)

Ang Estudyante, Bidyo ug Ang Unibersidad (Dili Pa Ulahi Ang Tanan)
By Genamos_US of Washington DC, USA

Mga pamantalaan, radyo ug sa kahanginan
Nagbansiwag ang balita sama sa gipistahan
Ang eskandalosong bidyo ang naugkat
Ang mga sugbuanon natingala ug nakurat

Apan sa unsang hitabo ug pagkabutanga
Ang ilang sekreto nakaipsot ug nag-una
Ang bidyo milupad sama sa bakunawa
Nga mibutho sa kalibutan na miguwa

Ang duha wala pa gayud makontento
Nakahukom na kuhaan nila og bidyo
Sa pagtimaan sa gugmang hilabihan
Nga naghubo sama ni Eba ug ni Adan

Duha ka managhigugmaay
Sa tam-is na gugma misulay
Duha ka mga pagbati gilumay
Sa lawasnong tawag nagtagay

Duha ka mga batan-on na gugma
Nagsinukliay sa ilang romansa
Sa pribadong lawak sila gidala
Nagpabuhagay sa gibati nagmata

Mga panagway puno sa kalipay
Sa gibuhat nila nga malaw-ay
Duha ka mga hunahuna unta maglikay
Sa bulohaton sa minyo sila nalukmay

Gitaho na 2 na katuig kuno ang milabay
Nagama  ang bidyo na puno sa pagmahay
Daghan ang mga nadamay ug mga napagan
Ang dungog sa ilang pamilya ug eskuwelahan

Dili nato husgahan ang ilang mga ginikanan
Sa gipangbuhat sa duha ka mga tinun-an
Gipaedukar nila sa relihosong tunghaan
Aron sa matarong ug sulondon matudloan

Walay tarong na ginikanan ang magtukmod
Sa ilang mga anak aron sila masukamod
Anaa ra gayud kana kanatong tanan
Ang kaakuhan sa dili pagbuhat ug dautan

Busa kitang tanan magmatngon
Ang kaulaw gayud dili masayon
Sa pagpanday balik sa kadungganan
Nga mahibalik ug atong panalaminan

Ato silang iapil sa atong mga pag-ampo
Ang kalinaw ug sa Dios pasayloon silang dako
Ang pagsabot nalang kanila sa ilang kasal-anan
Kay kinaiya sa tawo ang masayop ug kitang tanan

Dili nato sila tamayon labi na si Inday
Ang kadungganan niya sobra migamay
Bisag ulahi na ang pagbasol ug pagmahay
Apan aduna pay paglaum ang mangindahay

Kon ato man silang mga silingan
Ato silang tabangan paingon sa kaayohan
Kay nahitipas man sila sa maitum na dalan
Dad-on nato sila sa kahayag sa Diyos Amahan

Ang kinabuhi susama sa mga gapnod
Sa mga kasal-anan kita gianod-anod
Ang matag lingi ug lihok ning kalibutan
Aduna gayud kini kinutoban ang tanan

Sunday, February 3, 2013

Si Tikyu Ug Si Inday

Si Tikyu Ug Si Inday
Genamos_US of Washington DC, USA

Aduna akoy na mahinumdoman
Sa mga nanlabay nga katuigan
Kabahin sa among silingan
Ang kinabuhi nila pagahisgutan

Si Tikyu ug si Inday mga buotan
Bisag pobre malipayon silang tanan
Si Inday nga labandera ug tindera
Si Tikyu mangangasal usab siya

Si Tikyu ug Si Inday managhigugmaay
Nagkita kuno sila sa plasa nga gamay
Gumikan sa tinda ni Inday nga kalamay
Si Tikyu nga mipalit murag gilumay

Dinha kuno nagsugod ang tanan
Ning sugilanon sa gugmang hilabihan
Matud pa ni Inday, si Tikyu kuno siaw
Kay ang gugma kuno niya murag linogaw

Linogaw kuno kay simple ra og lami
Asin o asukar o bisag walay subak malami
Si Tikyu nga walay bisyo ug dili moinum
Sa kanunayng moulig sayo ug modumdom

Human sa trabaho si Tikyu maglong-ag
Mangitag isugnod ug mohapit molaag
Kay motan-aw diay ni Inday nga naninda
Sa tam-is na kalamay ni Inday nga gidala

Wala magdugay sila nagsinabtanay
Nagminyo ug nag usa ra kapanimalay
Si Tikyu nga misaad pa ni Inday
Ang gugma kuno niya molahutay

Mitakilid ang mga tuig ug nanambid
Si Tikyu ug si Inday kanunayng nag-ibid-ibid
Gitugahan silag duha ka mga anak
Sa tumang kalipay sila nagahilak

Si Tikyu ug si Inday mga kugihan
Nagtukod og negosyong gikalingawan
Si Inday nalingaw sa iyang baboyan
Si Tikyu ang nangunay sa ilang litsonan

Gipalad, midako ug milambo ang ilang negosyo
Nakapahuman sa ilang anak nga mao ilang gidamgo
Mapasalamaton sila sa Dios sa grasyang gipahat
Kay gibuligan sila sa kinabuhing haruhay nadawat

Mao kini ang estorya ko kaninyong tanan
Nanghinaot nga aduna kamoy nakat-onan
Sa kinabuhi, gugma, kakugi ug paningkamot
Uban ang pag-ampo ug sa Dios kita dili malimot

Saturday, February 2, 2013

Ang Adlaw Sa Mga Kasingkasing

Ang Adlaw Sa Mga Kasingkasing
By Genamos_US of Washington DC, USA

Makalingaw gayud ning uban
Kon Pebrero na gani ang hisgutan
Usa ra gayud niini ang paingnan
Mao ang Adlaw Sa Mga Dughan

Buwan nga daghan ang magsalimoang
Sa gugmang hilabihan na makaboang
Kadaghanan kanila ang mag-atang
Labi na kadtong mga dughan nga piang

Mga Parke, Sinehan ug Pribadong dapit
Nagsaulog sila sa gugmang tam-is ug pilit
Apan adunay usab uban na mga minghoy
Gumikan sa kanhing gugma sila na pusoy

Halinon kaayo ang mga bulak ug tsokolit
Mga nanimpalad sa gugma ang namalit
Kasagaran kanila mao gyud kini ang idalit
Pahalipay nila sa ilang gugma nga nasignit

Pagatam-is ra ba sa gugma kung bag-o pa
Bulawanong kalipay ug pagbati sa usag usa
Apan sa pagtalikid sa panahon may motumaw
Mga kalisdanan ug pagsulay masugatan moduaw

Mga hilak, katawa, pagmahay ug gugma
Mga pagbati nga masinati sa kinabuhi ta
Walay perpektong relasyon ning kalibutan
Ang pagpailob ug pagpasaylo ang pagahuptan

Kay mao man kini ang atong bugtong hinagiban
Sa matag unos ug hagit ning atong mga dughan
Dili nato kalimtan ang pag-ampo sa kanunay
Kay ang Dios ang tinubdan sa gugma ug kalipay

Busa kitang tanan magpasalamat ngadto sa langit
Kay ang gasa sa Dios ang gugma kanato gidalit
Dili nato kini abusahan ug gamiton sa kaboang
Aron ang kinabuhi himsog ug walay masayang

Wednesday, January 30, 2013

Ikaw Ang Ginasampit Ning Dughan

Ikaw Ang Ginasampit Ning Dughan
By Genamos_US of Washington DC, USA

Ikaw ang tinubdan sa gugma kung dako
Bisan pa ang gugma mo wala nay pako
Milupad sama sa hangin ug nahanaw
Mga pagbati kung ngano ikaw nahilaw

Bisan karon wala kana sa akong kiliran
Mga handumanan nagpabiling bulawan
Mga kagahapon kanunayng nagauban
Matag adlaw dili ko gayud mahikalimtan

Ambot kung ngano gayud dili ikaw mawala
Ning dughan ko ug sa akong hunahuna
Pagatudloi kining akong kasingkasing
Nga kanimo dili na gayud mobagting

Matag adlaw ang ngalan mo gisampit
Ning dughan ko bisan pa napuno sa kasakit
Hinginli kining dughan ko sa pagdumili
Kon ngano ba gayud ikaw ang akong napili

Pukawa kining akong kasingkasing
Sa ngilit sa kamatuoran kini napaling
Aron dawaton ang miabot na kalisdanan
Na ang kinabuhi diay adunay padulngan

Paaboton ko ang hingpit ug tukmang panahon
Mga kasakit karon ako lang sang pagaantoson
Ang kapakyasan sa gugma akong pagasabton
Naglaum sa ugma damlag na ikaw maangkon

Ginampo ko ikaw sa kanunay sa kahitas-an
Gipangandoy ko ikaw sa adlaw nga tanan
Bisan pa ang dagat mahubsan sa mga balud
Na ikaw ang akong higugmaon sa hangtod

Friday, January 25, 2013

Mga Pag-ampo Kang Senyor Santo Niño

Mga Pag-ampo Kang Senyor Santo Niño
By Genamos_US of Washington DC, USA

O Senyor Santo Niño, naga-ampo kami kanimo
Ilawom ning dughan nangayo kami og pasaylo
Ikaw ang among tingpanalipod ug kadangpan
Sa among mga suliran ug sa mga kalisdanan

Ikaw ang among Patron ning among dakbayan
Sa Sugbu, sa Pilipinas ug sa tibook kalibutan
Ikaw gayud ang milagrosong imahe nga balaan
Sapwanga ang among kinabuhi ug kanimo itugyan

Tan-awa kining among mga kasingkasing O Ginoo
Na makalikay sa mga katalagman ug mga peligro
Lamdagi kining among mga hunahuna sa kanunay
Sa pagbuhat og maayo ug sa kasaypanan mahalikay

Tagai kami sa igong kabaskog sa matag adlaw
Aron ipadayon namo ang Imong pagbuot ug laraw
Ayaw kalimti ang among mga tagsatagsa ka pamilya
Nga nagaampo Kanimo Sa Imong proteksyon ug grasya

Hupaya kami sa imong malumo nga kasingkasing
Aron ang among kinabuhi padayon sa pagbagting
Bendisyoni kining among mga hunahuna ug pulong
Aron ang grasya sa langit nga kanamo mopasilong

Dasiga kining among mga kasingkasing sa paghigugma
Dinha Kanimo ug sa tanan mga tawo na walay pagduhaduha
Tabangi kami isalikway ang mga yutan-ong hiyas ug batasan
Aron mahiduol Kanimo ug sa langit puhon kami mahiuban

Tabangi kami nga makapugong sa mga tentasyon
Mahilayo sa mga kadaut ug malaw-ayng bulohaton
Hatagi kami sa igong kaisog nga makigbatok niini
Aron ang among kinabuhi maluwas ug adunay bili

Himoa kami nga wais sigo sa imong kabubot-on ug balaud
Ug dugangi kining among mga pasensiya sa matag kalisod
Papasa kining among pagkahakog sa mga bahandi ug kuwarta
Ug ipuli ang bertud sa pagkamahatagon sa walay pagkaluya

Hinloi kining among mga lawas, hunahuna ug kalag sa mga sala
Nianang imong dugo nga mibanaw sa krus ug kanamo ipadala
Ikaw gayud  O Dios ang hingpit nga dalan sa kamatuoran
Ang kahayag sa among kinabuhi hangtod sa kahangturan

Amen.

Tuesday, January 15, 2013

Ang Gugma Ko Kanimo Labaw

Ang Gugma Ko Kanimo Labaw
By Genamos_US of Washington DC, USA

Panahon kadto sa tinglagas
Mga dahon sa sanga nanglagas
Ang hangin miabot mabugnaw
Uban sa mga panganod nga siaw

Makita ang mangiob nga kalangitan
Ang mamingaw nga mga kakahuyan
Ang nagpasad ang mga dahong laya
Nga gihabulan ang tabonon na yuta

Gilantaw ko ang mga panganod
Ibabaw sa mga kakahuyan gianod
Gibati ko ang panahon sa kabugnaw
Ang dughan ko napuno sa kamingaw

Matud mo ang gugma ta moluntad
Sa umaabot nga katuigan gihalad
Kung ngano ikaw sa kalit nahanaw
Ning kasingkasing ko kanimo giuhaw

Asa naman ako paingon dinhi karon?
Na ang kalibutan ko dili na mabulokon
Abi ko, imo akong ubanan sa hangtod
Ang gugma ko kanimo ug ikaw nasayod

Ang mga saad sa mga managhigugmaay
Daw usa ka dahong laya nga mogamay
Mangagupok, mapulbos kung kini komkomon
Sama sa atong gugma nawad-an sa sugilanon

Abi ko kadto, nasinati ko na ikaw
Sa pagtoo nga gugma, apan diay taphaw
Ngano man ang pagbati mo sa kalit nausab?
Gibuhat ko ang tanan ug ako kanimo na inlab

Pagakantahon ko nalang ang mga huni ug awit
Na kabahin sa gugma ug kanimo akong idalit
Pamasin sa inanay ikaw magkahanaw ning hunahuna
Aron mabatonan ko ang kalinaw sa gugmang nawala

Gawasnon na ikaw ug andam hikalimtan ko sa dayon
Dili masayon ang pagpasaylo sa gugmang naulipon
Apan kung kini ang pamaagi na makabaton og kalinaw
Akong buhaton kini kay ang gugma ko kanimo labaw

Friday, January 11, 2013

Ang Dagan Sa Akong Kahaponon

Ang Dagan Sa Akong Kahaponon
By Genamos_US of Washington DC, USA

Pagkahanap sa langit ning kahaponon
Nga naputos sa yamog ang talan-awon
Hamoghamog na ulan ang mitaliwan
Ang mamingaw na palibot natilawan

Nabasa ang yuta sa naghilak nga langit
Gibiyaan sa adlaw nga wala siya gisampit
Mga dahon na ngapagba sa iyang punoan
Gitayhop sa hangin nga gikan sa amihan

Malaay na kahaponon ang miabot
Ang mabugnawng kagabhion taliabot
Ang kilomkilom dili na gayud magdugay
Ug ang akong panihapon ako nang giaray

Gilantaw ko pag-usab ang gawas
Mangiob na kalangitan gidimalas
Apan ang mga tanaman naghudyaka
Kay nabusog sa uwan kung nakita

Nagpaingon nga gayud ang panon sa kangitngit
Milupad ang akong hunahuna sama gidagit
Gipadpad ngadto sa lapyahan sa kagahapon
Nakapanghupaw ako sa akong kaugalingon

Gidagsa ang akong hunahuna sa maong kanhiay
Susama nianing panahon nga nagpasumbingay
Dughan ko nagbutobuto sa gugmang naulipon
Kay didto sa dapit kami inday nga malipayon

Didto sa lagkaw ang gugma among gisaw-an
Ang kalipay nga langitnon among gitagayan
Ang imahe ni Inday nga kanako mapahiyomon
Giduwaduwaan lang ako ning akong imahinasyon

Apan sa kalit ang kamot sa hangin mihampas
Sa bintana milagobo ang hangin nga maidlas
Nahigmata ako sa akong lawom nga pangisip
Nahibalik sa kalibutan sa realidad nga misilip

Mapahiyomon ako nga nakurat ug nagkatawa
Ang dagan sa akong kahaponon ako nahigmata
Usahay dili malikayan ang handumanan mosulod
Labi na kabahin kini sa atong kinabuhi sa laktod

Tuesday, January 8, 2013

Ang Akong Kinabuhi

Ang Akong Kinabuhi
(Estorya sa akong higala Bro. Mario Baladjay)
By Genamos_US of Washington DC, USA

Gibalik ko sa pagtan-aw  ang panahon
Ang yugto sa akong kinabuhi  isugilon
Napuno sa mga pagsulay ug kalisdanan
Ang naagian kung suliran nahiagoman

Niadtong lugar nga akong namat-an
Halayo sa siyudad ug sa kalamboan
Nagdako nga simple ug may pangandoy
Sa kinabuhi ug pamilya ako kining iasoy

Ang baryohanon kung kinabuhi napuno sa sugilanon
Mga prutas, utanon, manok ug isda among kalan-on
Ang malab-as na hangin sa among baryo gituboan
Ang malinawon nga palibot dili gayud hitopngan

Madaghang higayon nga akong nasugatan
Mga kalisdanan miabot  sama sa hangin amihan
Gihagwa sa sakit na gidala sukad sa akong kabataan
Kung sa uban pa wala na gayud kunoy kasulbaran

Sukad sa akong pagkabata,  ako masakiton
Sa talandogon nga sakit na akong naangkon
May sakit akong Leukemia sukad pa kaniadto
Ang sakit ug kakapoy sa lawas walay ikabaylo

Daghan ang nag-ingon dili gayud ako magdugay
Sa gidala kung sakit ug ang lawas ko mopahulay
Gipinahan na ako sa doktor ang akong kinabuhi
Kanila way paglaum ug ang kamatayon ako mapili

Sigon pa sa doktor kaniadto nga misugid sa akong inahan
Dili na kuno ako kaabot  sa ika 21 katuig kung natawhan
Apan bisan pa iniini, wala ako mawagtangi sa paglaum
Nalimbasog  ug sa kanunayng naga-ampo sa Dios sa hilom

Ang gugma ug pagsalig ko sa Diyos sangko pa sa langit
Nga wala mausab bisan pa sa natilawan kung kasakit
Kay ang milagro sa Dios walay siyensiya ang makatubag
Nga hangtod karon ako dakong buhi ug ang Dios ang naghatag

Mapasalamaton ako sa Dios sa tanan Niyang gibuhat
Sa tanan kaayo ug pagsulay sa kinabuhi ako gihudlat
Ang tinubdan sa akong kusog naggikan man Kaniya
Ug ang mga suporta sa akong kahigalaan ug pamilya