Bulahang Bag-ong Tuig

Bulahang Bag-ong Tuig
By Genamos_US of Washington DC, USA

Sugaton nato ang bag-ong tuig
Nga walay dughan nagsangkiig
Mga nagkalandrakas nga mga ritwal
Aron himoon ang matag tuig nga espesyal

Ania nasab ning ang paghatag og mga gimbut-an
Kung matinood matuman dili kini hisapayan
Kay ang pagbuhat og positibo nga gitampo
Sa kinabuhi kini himoong ehemplo

Ang pag-uswag sa pananalapi
Nga maoy katuyoan ning kinabuhi
Aron sa matag adlaw nga tanan
Ang pamilya nato dili magutman

Daghang mga rason ang akong nahibaw-an
Gikan kini sa mga tawo nga akong nasugatan
Ang pagbag-o sa kinabuhi ilang kining gidumtan
Aron sa kalisod ug kasakit sila mapanalipdan

Dili nato talikdan ang mga nanglabay
Kay mao kadto ang barometro sa atong pagsubay
Ang pagpasalamat ngadto sa kahitas-an
Aron ang grasya padayon magauban

Madako ug gamay gidawat nga mga suliran
Kay sa langit kita mangayo og hinabang
Kung dili kita sa sakit makaantos
Kay sa mga pagsuway kita gihandos

Dili kita mawagtangan og paglaum
Kay adunay Dios nga mopahinumdom
Sa mga kakulian dili kita niya biyaan
Ang pag-antos ug kaluoy kita pagabaslan

Sa mga umaabot nga katuigan
Ang grasya sa Dios kita mapiskan
Aron ang kinabuhi may timik ang kahulugan
Sa gitugon ni Bathala dinhi sa kalibutan

Pagka-anidot nga katuyoan
Sa matag bag-ong tuig nga tanan
Ang paghigugmaay dili hikalimtan
Aron ang tibook tuig mabulahan

Ang Peligrosong biyahe sa Gugma

Ang Peligrosong biyahe sa Gugma
By Genamos_US of Washington DC, USA

Ang gugma nagsubay lang sa usa kadalan
Daghang mosakay aron ilang suwayan
Kasingkasing nila dili mapugngan
Kay nanimpalad aron makaplagan

Ang uban nga pagbati sa walay undang
Gumikan kini sa gugma nga hilabihan
Molahos usahay sa walay utlanan
Kung mapandol kini dakong kasakitan

Ang matag kasingkasing may igong agianan
Aron sa pagkaplag sa ilang mga kapalaran
Ang tunob sa mga damgo ilang gisubay
Aron sa hingpit nga katumanan dili magdugay

Sa mga pag-ampo ug pagsuway
Giagian murag walay pagmahay
Pagtoo sa Dios ug pagsalig
Ang tanan sa kahitas-an gisandig

Kay walay makapugong sa unsay moabot
Bisag atong ipadagayag ang atong pagsabot
Magpailob kita sa dughan nga puno sa kagubot
Kay walay igong luna kanang sige og bagotbot

Padayon kita sa pagsakay
Sa biyahe sa gugma kita gikamay
Bawnon nato ang pagbati nga tiunay
Aron busog ang gugma tang ipabuhagay

Ang Gugma

Ang Gugma
By Genamos_US of Washington DC,USA

Ang tinood nga gugma balaanon
Ug walay utlanan sa gidugayon
Nga naglagiting sa kainit ning atong dughan
Nagpaabot sa pagbati nga hilabihan

Walay maka-ugdaw sa nagdila-ab nga kahayag
O kaha makausab sa mga tunob sa pagpadayag
Bisan pa kini gihampas sa mga balod sa kalisdanan
Padayon ang tim-os nga gugma sa walay kausaban

Ang tinood nga gugma kahibalo mosangyaw
Sa mga tam-is nga pulong kini makalingaw
Ug andam maminaw sa mga hagawhaw sa pagbati
Kay ang dughan ko dili magdumili

Nganong hikawanan ang atong dughan
Sa pag pa-ambit sa gugma ning kalibutan
Dili ba angay ampingan sa pag-amoma
Aron mulambo ang romansa sa gugma

Dili ba kining gugma gipanday sa kamot sa langit
Nga gikulit ning atong dughan aron ipaambit
Dili kini pasagdan ang nagdila-ab nga pagbati
Nga mapalong lamang sa dayon nga walay ibugti

Sugnuran kini og respeto, pagsalig ug pagsabot
Aron ang tanan malipay ug walay maglagot
Atong ubanan sa hugot nga pag-ampo
Aron didto sa tiilan sa langit mosangko

Ihikling ang mga tunok sa kasilag, pagdumot ug pagsuway
Aron walay makaaway ug magamahay
Kay dinhi ning kalibutan atong itisok ang binhi sa gugma
Aron kini motorok ug magahari sa atong dughan nga walay mansa

Naamang nga Pagbati

Naamang nga Pagbati
By Genamos_US of Washington DC, USA

Nahibalo ko nga imo kung gimahal
Nga kanimo ang gugma ko wala nagdagmal
Kining tam-is nga pulong
Dugay ko nga unta sa imo ihunghong

Pero naabtan nalang sa imong pagbiya
Ang dughan ko nga nagyaya
Kay wala nako sa imo maipabati
Kining gugma ko sa imo nahilahi

Bisan sa pagmahay ako gigapos
Sa mga dangoyngoy kini gihipos
Kay ulahi nga ang pagbasol
Sa wala malitok nga pulong ako nahasol

Ihulat ko nalang kini sa umaabot
Sa insakto nga higayon ako nanghinaot
Ug didto sa laing kasingkasing akong idagkot
Nga kini pagbati sa dughan ko akong makoot

Alang Kanimo

Alang Kanimo
By Genamos_US of Washington DC, USA

Ang gibati ko kanimo
Tinood kini sa akong pagto-o
Sa wala ka pa niabot sa akong kinabuhi
Ang panagway niini murag piti-piti

Sa imong wala damha pag-abot
Ang mga luha imong gipangbagtok
Kay imong gihulipan ang kapait
Sa gugma mong walay kahadlok

Imong gidan-agan ang kangitngit
Sa kahayag sa imong tim-os nga pagbati
Susama sa akong kasingkasing nga gitugnaw
Gihabulan sa kainit ug kalinaw

Daw imong gipangpapas ang akong kagahapon
Kay sa tam-is mong gugma ako naulipon
Imong gitudluan pag-usab
Nga kanhi dughan ko gidunggab

Sa kapakyasan kini nisarasay
Ug ni banda ngadto sa kalipay
Ang mga saad ug panumpa
Nanghinaot kanimo nga dili madagma

Sa Ugma Damlag

Sa Ugma Damlag
By Genamos_US of Washington DC, USA

Ang imong pahiyom
Ang imong ngabil
Ang imong halok
Ang haw-ang kung gakos
Nga gitagana ko kanimo

Gimingaw ko ikaw
Ang imong alimyon
Nituhop sa akong hunahuna
Sa matag higayon
Sa matag adlaw nga tanan

Ania ra ko sa imong kiliran
Bisan halayo sa imong kalibutan
Nisaad ka kanako
Nga ikaw akong makauban
Pero diay usa lamang ka handurawan

Akong lig-onon ang akong kaugalingon
Sa pagbugno ning kamot sa kamingaw
Nangandoy ako
Nga damgohon ko ikaw
Ug dili ko kini buhian
Sa nagduka nga kagabhion

Ania ra ko, akong himaya
Sa pakigbisog ug kasakit
Manag-uban sa adlaw nga higayon
Sa ugma damlag
Sa kanunay
Sa kahangtoran
Ug sa tibook kung kinabuhi

Panahon Sa Rosas

Panahon Sa Rosas
By Genamos_US of Washington DC, USA

Dili kini panahon sa tingtugnaw
Ang mga tinanom kung rosas nahanaw
Kay didto ko sa yuta gibutang
Basin naay nagbalhin sa ka-ang

Panahon karon sa pagpamulak sa mga rosas
Nagkadaiya ang ilang mga kolor sa walay kupas
Nindot nga mga talan-awon
Sa halayo buot kining duawon

Ang mga idlas nga mga bulak
Ning turok nga nagsubwak
Kay didto sa bungtod nagpauraray
Aron ang tanan walay magmahay

Ang mga managhigugmaay nikuray
Kay sa hinatag nga rosas sila nalipay
Bulak nga talagsaon
Sa mga estorya may sugilanon

Huni sa gugma gipabati
Aron ang tanan mamati
Kay adlaw karon sa kasingkasing
Ang uban walay nangulitawo nga nanampiling

Buhata ang tinood

Buhata ang tinood
By Genamos_US of Washington DC, USA

Buhata ang tinood
Ang gibati ko nag-aginod
Sa akong ngabil
Mga pulong daghang pasangil

Dili ko makahukom
Sa hunahuna dili haum
Bisag unsay isulti
Dughan ko nasikwati

Nagkadaiya nga hunahuna
Sa mga panglantaw nagpakabana
Dili unta kini dugayon
Ang taak dali nga subayon

Ang maayong higala
Tinarong ang kawsa
Aron sa pagtabang
Sa tim-os nga hinabang

Busa paminawa
Karong panahona
Ang adlaw nagkatawa
Kay sa gugma nagkahiusa

Dili Ko Masabtan

Dili Ko Masabtan
By Genamos_US of Washington DC, USA

Ang tanan napugos sa pagpakisayod
Sa mga kalisdanan nga akong giguyod
Dili ko buot unta hilabtan ang pag-ugkat
Sa mga panghitabo nga ako nakurat

Kon dakong buhi pa gyud tong pagbati
Ang pagbuot sa akong dughan nagpamati
Lisud tubagon kining kahimtang
Kay ang gugma nikalit man lang pagka-amang

Wala ko masayod kung asa ako mosulod
Kay sa kalibug ako gibanlas sa mga balud
Kung asa kini idunggo
Kining kasingkasing ko nagsubo

Wala koy laing dalan nga paingnan
Kung dili lamang sa langit akong kadangpan
Ang kahayag sa akong pangutana ako nang nakaplagan
Kay ang gugma sa Diyos maoy diay tubag sa kahangturan

Ug dinhi nikunsad ang kamatuoran
Ang tinood nga tumong sa kalibutan
Ang gahum sa hunahuna may utlanan
Kung ang suliran dili ko masabtan

Ikaw

Ikaw
By Genamos_US of Washington DC, USA

Ikaw ang makahatag kanako og kalipay
Kung ang akong kalibutan naputos sa biay-biay
Ikaw ang tingog sa sayong kabuntagon
Nga nagpukaw sa akong katulogon

Sa matag tam-is nimong nga pahiyum
Ang kalibutan ko naputos sa katahum
Ikaw ang tingog sa kahilum
Nga naghatag og kosug sa akong paglaum

Ikaw ang nag-inusara kung pagbati
Nga kining gugma sama kalid-on sa bahi
Nga may bili nga handumon
Sa kalipay nindot tagamtamon

Pasaylo-a ko usahay malitok ang kagahapon
Nga kining dughan ko usahay naulipon
Sa mga suliran ug pagsuway gihagit
Nga kanimo dili unta idalit

Kining tanan akong gibuhat
Sa pagpanalipod sa gugma naghulat
Ikaw ang akong kasingkasing
Sa kalibutan ko nagtuyok murag kasing

Niadtong nilabay nga Pasko

Niadtong nilabay nga Pasko
By Genamos_US of Washington DC, USA

Niadtong nilabay nga Pasko
Akong gihatag ang kasingkasing ko kanimo
Pero sa pipila ka mga adlaw
Ang gugma mo nilupad ug nahanaw
Kay imong gibilin sa imong paglakaw

Karong tuiga, ako kining tapigan
Aron ihulat sa moabot nga katuigan
Ang nanga uga kung mga luha
Ako nga kining gikalimtan sa imong pagduwaduwa

Makadaghan nga higayon nga ikaw akong gihawiran
Nga kalimtan nalang ang mga nangagi nga suliran
Aron ang gugma bangunon pag-usab
Kining pagbati tang walay paglubad

Ayaw ihikaw kining higayon
Aron sa pagtul-id ning atong bulohaton
Kay pasko karon sa pagsaulog
Nga kanimo kini ipamalihog

Nanghinaot nalang ko kanimo
Nga sa higayon magkita atong mga anino
Dili mo ako talikdan pag-usab
Aron kining akong dughan dili manghuy-ab

Kay andam ko kini ihatag
Ang kasingkasing ko sa laing palad
Aron kini iyang dawaton
Ang gugma ko nga dili salawayon

Ang Gugma sa Pasko

Ang Gugma sa Pasko
By Genamos_US of Washington DC, USA

Sa Paskohanon yugto sa akong pagkabata
Nagsiabot nga gani ang pasko
Ang akong dughan nagpanikad naglagubo
Kay naputos ang akong hunahuna sa mga gasa og sinsiyo

Manuroy kami sa mga kasilinganan
Aron manaygon sa mga kabalayan
Apan walay makahulip sa kalipay ning kalibutan
Ang tingog sa pasko akong nadunggan

Kung atong aninawon ang mga panagway sa tanan
Napuno sa kilipay nga walay suliran
Kung atong sundan ang tunob sa Pasko
Ang kahulogan niini limpyo

Ang pag-atiman sa mga nanginahanglan
Maoy tinood nga mithi ning atong dughan
Bisag gamay atong pagpa-ambit
Walay igsapayan kay kini nalangbigit
Kay mao kini ang pasko nga hagit

Imong gugma, imong katawa, imong kaluoy
Nindot kini nga atong gipangandoy
Kay pasko karon ang tanan maghinatagay
Kinasingkasing mga gasa maoy itagay

Mainitong Pasko

Mainitong Pasko
By Genamos_US of Washington DC, USA

Dinhi ning among dapit
Ang matag tuig sa panahon sa Pasko
Amo gayud kining gipangandoy nga uwanon og snow
Bisan kini lisod matuman
Kay gipugngan man sa kapanahunan
Magsaulog mi sa adlaw sa kapaskohan puno sa kasadya
Inubanan sa giandam nga mga lami-an nga sud-an ug hudyaka

Bisag ang among mga singot nagbaha
Kay gipasilungan intawon sa kainit sa himaya
Walay igsapayan kung ang pasko init ang kahimtang
Bisan ang mga kaldero natulimbang
Kami Padayon sa pagpamaypay among mga silingan
Nga nagpunsisok ngadto sa mga simbahan

Bisan ang among kalipay gitapin-an sa mga panghupaw
Kay ang haring adlaw dili among ikaulaw
Aduna mi mga hawod nga paskohanong mga butang
Mga hayag nga suga, mga gasa, lantaka ug mga luthang
Amo kining giandam sa pagsugat ning kapaskohan

Pagkaanidot nga palandungon
Kining mga nindot nga mithi atong subayon
Ang mga nindot nga talan-awon
Ning dapit nga among gipuy-an bulawanon
Ang mga kalanggaman nagsiabot sa daplin baybayon
Aron pun-on sa katahum ang among pasko
Binuligan sa maayong mga sa sugilanon

Pagkaanindot gayud ning among pasko
Talagsaon ug simple nga pagpangandam
Dinuyogan sa maayong pagpamalandong
Ning mainitong Pasko among saulogon ang paghandom
Bisag pa ang idlas nga adlaw muabot ang pagkisdom
Padayon kaming tanan magpahiyom

Christmas Tree

Christmas Tree
By Genamos_US of Washington D.C., USA

Christmas Tree, nagpangidlap sa kahayag
Naputos sa mga gagmayng bumbelya, init-init ug may dan-ag
Bililhon nga simbolo sa atong gugma
Alang sa panahon sa pasko ug kahingpitan
Magpakita sa matag kagabhion ang iyang kaanindot nga masiga

Sa matag mata makadayeg sa iyang katahum
Christmas tree, ayaw ako pakyasa
Ipakita ang imong tinuyo nga kaanyag ug korona
Ang anghel, bituon ug mga piraso nga masiga
Aron ang pangilin sa Pasko puno sa kamaya ug gasa

Kini ang imahen, dalisay, mithi ug hingpit
Alang sa paghanduraw sa Pasko mahigugmaon ug tam-is
Kay banaag sa dagway ni Kristo Hesus ang tinood nga tinubdan sa Pasko
Simbolo sa kaulay ug inosente
Nga walay mansa sa mga sala
Oh Christmas Tree, gihigugma ko ikaw
Ayaw intawon ko ikaulaw

Ang Kasadya sa Pasko

Ang Kasadya sa Pasko
By Genamos_US of Washington DC, USA

Ang mga parol gipangsab-it nga sa mga kabalayan
Inubanan ang paskohanong mga huni ug awit
Ang mga kasingkasing gipuno sa mga paghigugma
Kay mao man kini ang diwa sa pasko mga higala

Ang paghinatagay, ang pagbinayluay og mga regalo,
simba sa gabii, mga pagpanaygon ug mga kumbira sa pasko
Mao kini ang mga talan-awon ug kinaiya ning taliabot nga ang pasko

Ang tanan nangandam sa usag-usa
Aron sa paghatag og katahuran
Sa paghinumdom sa pagkatawo sa balaang bata

Mao sab kini ang panahon ang tanan magkahiusa
Malagyo o duol ang tanan malipayon
Puno sa kadasig ug kalinaw
Ang panagdait, kahusay ug pagsinabtanay maoy pagbati sa tanan
Pag-anindot kaha kung ang tanang adlaw kay pasko
Ang palibot walay kagubot og kaguliyang

Ang mga panagway sa mga tawo
Mapahiyumon ang tanan
Puno sa paglaum ug kahidlaw sa umaabot
Ang paghatag og pasalamat sa tanang grasya
Sa mga nanglabay nga mga adlaw

Dili man tanan gipalad sa kahigayonan
Ang tanan may kinutuban ug utlanan
Sa kinabuhi kita gitiaw-tiawan
Pero ang kasadya sa pasko maoy gibantayan sa tanan

Ang Risipi sa Pasko

Ang Risipi sa Pasko
By Genamos_US of Washington DC, USA

Nagtipon-og ang nagbinata nga mga hunahuna
Aron ablihon kining layaw nga mga mata
Niabot sa wala damha nga mga gasa sa kinabuhi
Sa mga matag-adlaw tam-is nga sopresa niagi

Sagolan sa mahigugmaon nga pagdayeg
Sa mga katawhan kini atong ipaambit panagdait
Sama sa mga paskohanong kandila
Nga sa isig-usa kanila may talagsaon nga dan-ag

Atong dungagan og agik-ik ug talidhay
Uban sa lami-an nga mga pagkaon sa Pasko nagpangamay
Ang hiwa sa adobo makapausbaw sa atong panghunahuna
Isawsaw sa halang nga suka nga taytayan sa tawhanon kaluoy

Bahugan sa dugodugo puno sa gugma ug pagsabot
Gidekorahan uban sa pansit sa paglaum ug kadasig
Aron ang kalipay sa walay puas mopilit
Atong gamiton ang himsog nga risipi sa Pasko uban sa awit

Atong hinumduman kining tanan
Nga ang tinood nga espirito sa Pasko
Dili lang sa buwan sa Desimbre
Kon dili sa tibuok natong kinabuhi

Maayong Pasko, Pinangga

Maayong Pasko, Pinangga
By Genamos_US of Washinton DC, USA

Mga Greeting cards ako nang gipadala
Kay ang pasko taliabot na
Pero aduna koy usa ka gitungoha
Espesyal alang kanimo akong gipangga

Maayong Pasko, akong pinili
Bisag tinood ikaw nahilayo dili ako magdumili
Damgohon ko nalang ikaw
Bisag ang dughan ko giuhaw
Nga nagpaabot kanimo nakapanghupaw

Kining pangilin sa pasko
Puno sa kalipay ug panagdait
Ang tanan magsaulog masadyaon
Aron sa paghinomdom sa atong Manunubos

Pero alang kanako ang pagsaulog sa pasko
Dili lang sa pipila ka mga adlaw
Kon dili sa tigbuok tuig akong gilantaw

Nahinomdom ko sa niadtong nilabyng tuig
Ang atong panag-uban kita sa kalipay gibulig
Ang mga suga sa Christmas Tree
Nga atong gisab-itan sa mga adorno
Uban sa atong mga giputos tang mga regalo

Karon paskoha, ang kahilom maoy nagpasulabe
Kay ang kamingaw ko kanimo giduble
Ang matag kidlap sa akong gisugnod nga mga kahoy
Nagtimaan sa dughan ko napuno sa dangoyngoy

Kung hain man ka karon gugma gidagsa
Malipayong Pasko akong gipanghinaot, akong pinangga
Uban sa paskohanong mensahe ko gipadangat
Kining ipabati kung balak sinulat nga kanimo gipahat

Hilom nga Kagabhion

Hilom nga kagabhion
By Genamos_US of Washington, DC, USA

Hilom nga kagabhion, balaan nga kagabhion
Malinawon ang tanan, masanagun ang tanan
Sa layo ang batan-on nga Birhen, Ang inahan ug anak
Ang balaang bata hinay ug malumo
Nakatulog sa langitnong panagdait

Hilom nga Kagabhion , Balaan nga kagabhion
Ang nagsiabot nga mga pastol sa halayo
Aron sa paghimaya sa agos sa langitnon tawag
Ang langitnong Hostiya, sa pagkanta og Aleluya
Kay natawo Si Kristo Hesus ang atong manunubos

Hilom nga Kagabhion , Balaan nga kagabhion
Ang Anak sa Diyos ang dan-ag sa kahayag
Masilak nga silaw nidan-ag sa balan-anong dagway
Daw usa ka basibas uban sa grasya nga maoy maglukat kanato
Si Hesus ang atong Ginoo ang iyang pagkatawo

Ang Paglaum sa akong mga Damgo

Ang Paglaum sa akong mga Damgo
By Genamos_US of Washington, DC, USA

Kitang tanan adunay tagsa-tagsa ka mga damgo
Masayon man o lisod kab-oton ning atong kinabuhi
Adunay gyud kitay tumong ning atong pagpakabuhi
Nga padayon gihanduraw ning atong hunahuna nagkapuliki

Ang atong mga damgo sama sa usa ka bulawan
Nga dili puwede kini ibaligya sa laing handurawan
Mahinungdanon kining atong mga damgo sa atong panahon
Kay mao kini ang naghatag kanato ug kadasig sa naghulat nga paglaum

Sama sa kalangitan nga gikoloran sa mga asul nga panagway
Kay dinhi sa kalibutan nabuak ang tinuod kung pagbati
Nga kadtong mga nindot kung mga damgo gipangsalikway
Sa naghulat nga kalisdanan ug pagsulay

May igong panahon kining akong hunahuna sigun sa akong pagtoo
Kay ang gibati kung kinabuhi may igong ritmo sa sugilanon
Inubanan sa pagkisdum sa langit nga gipulbusan sa abohon nga mga panganod
Ug didto nahanaw ang mga damgo nga dugay ko nang gihawiran
Nibiya kay gikataw-an sa naglibog nga kapalaran

Ang kinabuhi kung gibati padayong sa pagkahinog
Ug ang matag huyatid sa bag-ong adlaw nga nagdala og dan-ag nagsaulog
Ang suga sa akong dughan nagpadayon sa iyang kahayag ug kahidlaw
Aron kab-oton kadtong nahisalaag nga mga panglantaw
Nga dugay kunang giplano nga gilaraw

Tingali kung sa oras nga hunongon ko ang pagsulat
Kining balak kung padayong nga naglurat
Basin ang tubag sa paglaum ko naghulat
Kay ang panaw sa akong mga pag-ampo
Nga ang kahayag sa akong ugma aron ako molambo

Karon, Ani-a naman ko sa adlaw sa pagpamalandong
Aron sukdon kadtong natuman tang mga damgo atong gilumpong
Uban sa pagpasalamat ngadto sa kamot sa Langit
Ug kadtong mga pakyas nga mga damgo nitidlum sa kahilum
Kay pagboot kadto sa atong mahal nga Makagagahum

Ang Suwat ni Nanay

Ang Suwat ni Nanay
By Genamos_US of Washington DC, USA

Anak, kung maabot nagani ko sa takna sa akong pagkatigulang
Sabta intawon ko sa akong kaugalingon basi sa akong pangidaron
Nanghinaot ko nga taga-an mo ako og dako-dako nga pagsabot

Kung sa higayon nga ako maka buak og plato, baso
O kaha makayabo og sabaw sa talad sa atong pagpanga-on
Ayaw intawon ko kasab-i kay nagkahanap nga gyud ang akong panan-aw

Kahibalo ka Anak, kung magkatiguwang nga gani ang usa ka tawo
Luoran ug dali nga kaayo masakitan bisag sa mga pulong lamang
Ako nalang giduko akong ulo ug magpatulo sa akong mga luha
Sa higayon nga ikaw masuk-anon dinhi kanako

Dili ko gusto motubag sa akong panig
Kay basin masayop ang imong pagsabot dinhi kanako
Anak, kung naa ka may isulti kanako nga dili ko masabtan ang imong mga pulong
Ayaw kadali kasuko ug palihug ayaw intawon ko tawga og bungol
Kay nagkahinay nga ang akong kaugalingon sa pangdungog
Kung mahimo imong nalang isulat ang imong isulti aron unya akong basahon

Pasensiya nga anak kay tigulang nga gyud ko
Kay hinay-hinay nga gyud ning akong mga tuhod
Nga maglisod gani ko sa pagbarog
Nanghinahanglan ko sa imong ayuda
Aron imo kung agakon sa pagtindog sa insakto

Bisan nga gikapoy kana sa imong pagsilbi kanako
Hatagi lang ko gamay-gamay nga higayon ug pagsabot
Ug mangayo ko daan og dakong despensa
Sa imong nasugatan nga kalisod

Sama niadtong sa gamay pa ka nga nagsugod palang pagkat-on og lakaw
Diha ko permi sa imong kiliran nga nahimoot ug nagbantay kanimo
Nga dili ka matumba sa imong matag lakang
Mao sab unta anak kining akong hangyo kanimo
Nga dili ko nimo biyaan bisag sa akong katapusan yugto sa akong kinabuhi

Nahadlok ko anak nga mag-inusara nagpaabot sa takna sa akong pagpanaw
Nga walay koy masampit lain sa akong mga tugon
Pasinsiyahi lang gyud ko anak, kung mang galing
Magbalik balik nako og paglitok ang mga pulong
Murag plaka nga nagarasan sa iyang pagtukar

Paminawa lang gyud anak, aron imo kung masabtan
Ayaw lang ko kataw-i o kaha mapul-an sa pagpaminaw dinhi kanako
Anak, nahinumdum ka pa ba sa gamay ka pa?
Kanang naa kay gustong pangayo-on, imong ibalik-ibalik og sulti
Bahalag magkayuring nga ang imong mga sinulti-an
Dili mo ako lung-an sa paghangyo hangtod ihatag ko kanimo ang imong gusto
Kay dili ko kaako nga ikaw akong mabalibaran

Nahinumdom ka pa ba kadtong buhi pa si Tatay nimo
Nga abunda ang atong kinabuhi sa nagtubo pa mo
Kasagaran mauwahi siya pag-uli kay nangita pa og kaayohan
Aron ta makakaun sa insakto og makapalit sa atong gusto
Gimingaw nako sa imong Tatay, Anak.

Dugay-dugay nga gyud nga wala mi magkita
Bisan sa damgo lang, iya kung pakit-on sa iyang mga pahiyom
Tibook nga ang akong adlaw alang kaniya
Pero Anak, akong nalantawan nga dili naman siguro ko magdugay
Ning kalibutan ug maangkon kona ang akong buhing pangandoy
Nga magka-uban nasab mi ni Tatay nimo ngadto sa laing kalibutan
Ug ayaw kalimot kanamo sa pagdu-aw sa among lubnganan
Aron sa paghalad og buwak og kandila inubanan sa mga pag-ampo

Anak, pasinsiya nga dali nga kaayo ko sapoton
Panagsa nga dili ko nimo masabtan sa akong kaugalingon
Bunga siguro ni sa akong pagkatigulang
Siguro nakadungog ka nako nga magdanguyngoy sa kasakit
Sa akong kabukogan ug kalawasan nga akong gi-antos nga daan

Kung naa kay gamay panahon, Anak
Dalikyat unya diri sa pagdu-aw kanako
Aron imo kung panihumdoman sa mga nangaging panahon
Kadtong mga tam-is nga higayon nga buot handumon pag-usab
Ayaw kalimot, Anak. Sa kanunay ko ikaw gihandum ning akong dughan
Uban sa akong gugma ug pagsalig dinha kanimo

Gilaay nga gyud ko Anak nga nag-inusara ni ining balay
Sa kaniadto nga napuno sa hudyaka, katawa og kalipay
Karon, ang matag sook napuno sa kahilom ug kangitngit
Samtang naghulat ko sa adlaw nga mulabay

Anak, sa higayon nga dili nga gyud ko kasugakod sa akong gipamati
Ug naglubog nga ko sa banig naghangad nalang sa imong mga ayuda
Nanghinaot ko nga imo kung atimanon nga walay pagkalaay
Tutal, inihap naman ang akong mga adlaw ning kalibutan

Kung moabot nga gani ang adlaw sa akong paglakaw
Akong pangayo-on ang imong mga kamot
Aron maghatag kanako og kaisog sa pag-atubang
Sa naghulat nga kamatayon
Ayaw sabta Anak, nga nahi-ubos ko kanimo
O kaha naay gamayng gitapigan nga pagsaway

Ug Ako mapasalamaton dinha kanimo sa imong tanang kaayo
Kung ako nga gani maatubang si Bathala
Akong ihunghung kaniya ang imong ngalan
Magarbohon nga isugilon ang imong gibuhat
Ug Ako, masaligon nga iya sab nakita ang imong gugma
Nga tiunay ug walay mansa sa pagmahay

Ug sa katapusan Anak, pag-amping mong tanan
Ug ayaw kalimot sa pag-ampo sa kanunay ngadto sa manggiloy-ong langit
Ug ayaw sa pagkalimot sa pagpasalamat kanunay sa tanang mga kaayo,sa kalipay
Ug kasakit nga iyang gihatag dinhi ning atong kinabuhi sa matag adlaw
Ang iyang pagbo-ot maoy bugtong matuman kay Siya man ang kahibalo sa atong padulngan
Dinhi nalang kutob Anak, kay mapahulay nako

Ang Handurawan Sa Akong Mahal Nga Inahan

Ang Handurawan Sa Akong Mahal Nga Inahan
By Genamos_US of Washington DC, USA

Sigun sa sugilanon sa akong mahal nga inahan
Sa niadtong nagsugod pa lang akong kalibutan
Aron pagtul-id sa akong layaw nga hunahuna
Bunga sa akong pagkabata

Matud pa ni Nanay
Ako ra kuno ang iyang kalipay
Sa nagsugod palang pagkat-on
Sa mga adlaw-adlaw nga bulohaton

Iya kung gitudlo-an sa maayong pamatasan
Sigun sa tugon sa iyang mga ginikanan
Lab-as pa sa iyang panumduman
kantong nindot nga handumanan

Siya nahimoot sa una kung pagkat-on og pagtikang
Sa akong nagkindang-kindang nga mga lakang
Iya kung gigunitan sa akong matag lihok
Nga wala ko niya buhi-i bisan sa iyang pagpamilok

Walay makasakbang sa iyang mga paningkamot
Dinuyogan sa iyang mga sakripisyo ug singot
Bisan sa iyang pagkalapoy
Wala niya igsapayan ang mga kakapoy

Nilabay ang mga nag-aginod nga katuigan
Ug ang bata nga iyang gialagaran
Nidako nga nagsubay sa iyang kapalaran
Aron sa pagtuman sa iyang mga tugon
Nga padayon nga iyang gihalaran

Dili sayon ang dalan sa akong kalampusan
Sa mga ta-ak nga akong gisudlan
Pag-ampo ug kakugi nga akong gipahimuslan
Sa matag hagtok sa mga orasan

Dili ko kini makalimtan
Ang mga tugon sa akong inahan
Kay kining tanan akong inuslan
Ang Handurawan sa akong mahal nga inahan

Ang Panagway Sa Matahom Nga Kabuntagon

Ang Panagway Sa Matahom Nga Kabuntagon
By Genamos_US of Washington DC, USA

Ang adlaw nibangon ibabaw sa pungkay sa mga bungtod
Komo ang akong kasingkasing napuno sa kamaya
Ang iyang bidlisiw nakapadugang sa kadasig ning akong gugma
Nga siya uban ning akong kiliran, akong pinangga

Pagka-anindot ning sayong kabuntagon
Ang lab-as nga yamog diha sa mga balili
Ang mga awit sa kalanggaman dinuyogan sa kasikas sa mga tanaman
Uban sa huyohoy sa bugnawng hangin
Siya nahinanok sa iyang pagkatulog

Sa akong pagpadayon pagsud-ong kaniya
Akong gihagawhaw kaniya ang gugma kung gibati
Aron ipabalon kaniya ngadto sa iyang mga damgo
ang gugma kung walay pagkatun-as

Akong gikalipay ang kahilom sa palibot
Samtang gibantayan ko ang matag lihok sa iyang ngabil
Uban sa tam-is nga pahiyom bunga sa iyang pagdamgo
Siya ang nagdala og kalinaw ug kahapsay sa akong kinabuhi
Daw usa ka ginagayday sa tubig gikan sa busay

Ang gibati ko, gianod mo ngadto sa lapyahan sa gugma
Aron didto tagbo-un ko ang imong tam-is nga pahiyom
Uban sa mga saad ug panumpa
Awiton ta, ang mga awit sa gugma aron padayon sugnoran
Kining gibati ta nga hilabihan

Pinangga, ikaw ang tanan ning akong kinabuhi
Ikaw ang tag-iya ning akong kasingkasing
Nga andam panalipdan ug alagaran kining gugma ta nga naghari
Puno-on ko ang imong kasingkasing sa akong pag-amuma
Aron sawhan ta ang kalipay nga walay katapusan ning kinabuhi

Sa hinapos ning balak ug sa imong paghinanok
Dal-on ko kining kalipay og kadasig
Sa nagsubang nga adlaw ang katahom og kalinaw
Ning panagway sa matahom nga kabuntagon

Pamati-a ang gibati ko

Pamati-a ang gibati ko
By Genamos_US of Washington DC, USA

Niadtong usa ka dili malimtan nga higayon
Samtang nagdung-aw ko sa kaanyag sa palibot
Ibabaw sa tambuanan sa akong hunahuna
Ang imong panagway daw nilabay nga usa ka bugnawng hangin
Nga nikuray ang akong kahiladman sa tumang katugnaw

Dili ko masabot ang gibati kung kiwag ning akong dughan
Kung kini usa lamang ka alimongaw
Ug sa akong pag-aninaw samtang nagka-awop ang adlaw
Ang iyang kahayag maoy naka-uknol sa iyang palibot

Ang iyang gilaw nilahos sa kahilum
Nga nidakin-as sa lumoy niyang mga buhok
Ug didto niluta ang kaanyag nga walay sama
Inubanan sa madanihon nga pahiyom
Daw usa ka sining sa Mona Lisa

Ug dinhi nasiak ang kahilum sa akong dughan
Nga ang tinubdan sa tingog
Naggikan sa hinagawhaw sa akong kasingkasing
Ug didto natawo ang lengguwahe sa gugma
Nga dugay ko nang gilitok ilawom ning akong dughan

Ngano man, kung sa takna nga ikaw akong makita
Daw ang akong dila masangit sa talinggab sa imong imahe
Nga dili ko masabtan ang dughan ko nga puno sa pagbati
Nga kanimo gusto ko kini ipabati

Ang Giya sa akong Tumong

Ang Giya sa akong Tumong
By Genamos_US of Washington DC, USA

Nagkapakapa ang akong hunahuna
Nga napuno sa mga kasayuran
Gihinay-hinayan ang pagkurikuri sa akong pangisip
Aron bugnawon ang hunahuna sa mga distraksyon
Kay pamasin adunay sampotanan sa akong emosyon

Kadtong nag-alindasay nga hunahuna
Nga walay insaktong hanig sa mga katuyo-an
Maglisod pag-irog sa iyang padulngan
Kay gisungog sa kapalaran

Kung malisod man kini wad-on
Ang salimbong sa hunahuna
Bunga sa paghuyatid sa pagduha-duha,
O kaha ang huy-ab sa kabalaka
Nga inubanan sa anino sa kahadlok
Kining tanan usa lamang ka mga hagit
Sa nag-inusarang kinabuhi

Kung matipon nato ang mga distraksyon
Aron ilubong sa dayon
Dali ra tugkaron ang tinood nga tumong
Sa gitinguha ko kini ipadayon
Aron ibalon ang singot sa paglimbasog og kalig-on
Nga kansang tumong dali ra kab-oton

Ang kusog sa kaalam naggikan man sa atong hunahuna
Aron agawon ang idlas nga tuyo
Walay pagpanagana og pag-atras sa naghulat nga hagit
O mga ipasumangil sa nagbagbag nga mga pagsulay

Kung kining tanan atong mabuhat
Ang kalampusan nga nagmaya naghulat
Sa gitangkil kung giya sa akong mga tumong
Nga ang kalibutan nagtuyok nga mabulokon
Sa pagpadayon nga wala mag-urong

Ang Saluyot (Jute Leaves)

Ang Saluyot (Jute leaves)
By Genamos_US of Washington DC, USA

Tanom nga napuno sa mga bitamina, mineralis og uban pa
Makaayo sa panglawas, pataas sa kinabuhi ug makahatag og gana
Dahon nga lunhaw aron sa pagpalab-as sa atong panan-aw
Nga miturok palibot sa gipuy-an kung lagkaw

Didto sa bukid nga akong gipuy-an
Gikagubtan sa mga katawhan
Pagkalami gayud kung isagol kini sa sud-an
Aron malipay ang sinugba kung tinap-anan

Sigun sa akong mga katigulangan
Dugay nga kining gikahinaman
Tanom nga dali ra kining makit-an
Sa mga katawhan gipahimuslan

Daghan nagpamatu-od nga naayo sa ilang kalisod
Sa sakit sa panglawas sila gipanghapyod
Dili sila makatuo kung unsay nakaayo
Apan sa tinood diay kadtong saluyot nga sila gihaylo

Walay tiaw kining mga kamatuoran
Nga gipangsilhig ang mga sakit sa balatian
Sakit sa kasingkasing, cancer, diabetes o hypertension
Ug uban pang mga medikal nga kondisyon

Busa ayaw kalimot sa pag andam kanunay og saluyot
Nga kanunay isagul sa regular nilang mga diyeta gisugyot
Sama sa tinuwa nga pasayan ug gukita
Nga binakbakan sa kamatis, okra og luy-a

Pagkakalas gayud og kan-ong bahaw
Kay ang dahon sa saluyot gisawsaw
Sa limonsito nga gipahungaw hilaw
Apilan sa paghigup sa tam-is nga sabaw

Hinumdumi Ako

Hinumdumi Ako
By Genamos_US of Washington DC, USA

Usahay dili ko mapugngan ang pagdahili ning akong mga luha
Sa pag-aninaw sa nilabayng mga katuigan
Dili ko usahay masabtan kining akong dughan
Kung unsay akong gikabalak-an ning kalibutan

Wala ko masayod kung kapila kahigayon nga ikaw akong gihagkan
O kaha gibugkos ning akong mga gakos sa adlaw nga tanan
Lab-as pa kanako ang atong mga kagahapon
Sa nagsugod pa ang atong kaminyo-on

Dili maihap ang mga higayon nga kita nibarog sa atong kaugalingon
Gawasnon ibabaw sa naghulat ug hagit sa mga kalisdanan ug tentasyon
Nahinumdum kapa ba sa niadtong kagahapon
Nga akong unang gihagawhaw kanimo kining pulong nga “Gikinahanglan ko ikaw”
Inubanan sa mga init mong mga gakos og halok

Akong gipadayag ang gugma kung gibati nga walay pagduha-duha
Ug sa kalit imong gikuha ang akong mga kamot ug gibutang sa imong mga aping
Samtang imong gilitok ang pulong sa gugma nga dugay ko nang gihulat maangkon
Ug didto natagak ang luha sa kalipay nga gigambalay sa gugma tang nagpa-uraray

Pagkatam-is palandungon kadtong masadyaon tang kagahapon
Inubanan sa mga katawa og hudyaka sa nagdako tang mga bata
Ug sa kanimo ako kanunay gipangga
Wala ko damha ang mga katuigan nga dali ra sa pagkapakli
Daw usa ka huros sa hangin nga nilabay

Wala nga koy lain gipangayo kanimo
Kon dili sa pagpadayon sa paghigugma kanako
Uban sa imong mga saad og damgo
Nga kanunay masaligon kanimo
Mao sab kini ang akong ikadalit dinha kanimo
Kining halad kung kinabuhi og kalag alang kanimo

Makalimtan ko man ang akong ngalan sa moabot nga katuigan
Bunga sa pagtakilid sa adlaw ning atong pagkatigulang
Dili ko itugot nga hikalimtan ang imong ngalan kay gikulit kona sa akong panumduman
Uban sa gitisok kung gugma og pagsalig sa akong dughan

Ug sa kataposan ning taas kung balak
Nga kanimo kini gihalad
Sa kanunayng nag-ampo ngadto sa langit sa kalipay og kasakit
Nga kadtong mga saad og panumpa nga walay paglubad
Kita ra gihapon ang mag-uban hangtod sa katapusan
Sa inuslan tang kinabuhi dinhi sa kalibutan

Ang Tambalanan

Tambalanan
By Genamos_US of Washington, DC USA

Didto sa dapit ning akong gipuy-an
Duol sa akong yutang natawhan
Aduna koy nakita nga ospital
Nga gialirongan sa mga koral

Daghan mga tawo kanunayng naglinya
Aron sa pagpahimolos sa sebisyo nga gitagana
Sa tambalan kuno nindot ang mga kahimanan
Aron sa pagtambal para sa atong kaayohan

Doktor, Nars og uban pa
Nga kahibalo sila sa ilang mga bulohaton
Sigon sa mga sugo sa ilang administrasyon

Nindot unta ang pagsirbisyo nga walay gipinig
Bisan gikan sa pobre nga bulsa nga walay pagsalig
Kay mao man kaha ang ilang gipanumpa-an nga mga panaad
Ila unta kining taga-an ug mga pagtagad
Para malipay kining mga pobreng nga palad

Busa atong i-ampo kini sa langit
Kining atong mga kasakit
Aron kadtong nahingtondan mahagit

Ang Kagahapon

Ang Kagahapon
By Genamos_US of Washington DC, USA

Lab-as pa sa akong panumduman
Kadtong nilabayng katuigan
Kay wala ko masayod
Kung asa ang sinugdanan
Sa mga nangapapas nga utlanan

Nilabay ang mga katuigan
Ang dughan ko padayon nagbangutan
Kay sa kagahapon kanunayng gipugngan
Ngano kaha kini lisod buhian?
Ug ngano kaha kini padayon gipahimoslan?

Dili ba kaha kita giduyan lamang
Sa nasuko nga kalisdanan gipanimaslan
Pagkasakit handumon pag-usab
Ang mga nangaging panahon
Puno sa kahiubos nga halandumon

Sa imong paglakaw
Dughan ko nakapanghupaw
Bisan nahugno kining panglantaw
Nahunong ang mga damgo tang gilaraw
Kay sa mga saad kita gimingaw

Didto sa daplin ang nagduka nga baybayon
Akong gisubay ang mga tunob
Sa akong nagkahanap nga handumanan
Aron handumon pag-usab kadtong panahon
Inubanan sa mga hinogan-ob sa mga balod

Gipadpad ang nasaag kung panumduman
Didto sa singsing nga imong gibuhian
Gihatag ko kini sa pagtimaan
Sa mga pagsalig akong gitindugan
Nga kanimo gidawat niadtong nilabyng katuigan

Wala ko damha nga mao diay ni ang dangatan
Sa nagun-ob kung kalibutan nga gisakitan
Gugma ug Pailob sa kanunayng giatiman
Bisan giduaw sa mga halok sa kalisdanan
Nangandoy kini mulambo sa mga katuigan

Pagka-anogon sa mga saad
Imong gibuhi-an nga nilupad
Nga ang dughan ko naglabad
Bisan gibudhian sa walay paglubad
Gikan sa imong bugnawng mga palad

Pasaylo-a ko kung ako man ang nasayop
Sa nabilanggo nga kagahapon kita gihigop
Buhi-an ko nga ikaw karon sa walay mahay
Ug tak-upan kadtong maot nga kagahapon
Aron ako magpabilin nga magmalinawon

Higala

Higala
By Genamos_US of Washington DC, USA

Gusto ko tugkaron ang tinood mong pagbati
Kung ako ba imong unongan bisan sa kataposan ning kinabuhi
Mahimo ko bang ikasulti kining mga tinagu-an kong pagbati
Kay sa dughan mo kini akong ipahid ang gibati kung pasalig

Walay tatsa ang atong panag-uban
Kay sa gugma mo ako gipurongan
Imo kung gidawat sa akong pagtawo
Ug mao sab ang akong pagbati ko kanimo

Kung sa takna sa imong pag-subo
Gitagana ko kining akong abaga
Alang kanimo sa imong pagbakho
Kining mga bukton sa kanunay ko kini ihabol kanimo
Aron pad-on kadtong mga kahasol sa imong anino

Kung sa panahon nga ako nanginahanglan kanimo
Andam ka ba motabang sa walay pagdamgo
Bisag adunay kapay gibisihan sa kinabuhi
Ako pa ba gihapon ang imong gipili

Higala, ayaw sa pagkalimot sa atong mga saad
Kay akong idunol kanimo kining akong mga palad
Aron sa paglingaw sa imong mga luha
Nga gikaluha-an sa ibabaw ning yuta

Akong ihatag kanimo akong mga pahiyom
Aron mokanay ang imong katahom
Ibalon mo kini sa imong paglakaw
Inubanan sa imong mga laraw

Dili ko ikaw hikalimtan ning akong dughan
Bisan sa kahadlok imo kung gikuyogan
Kay sa kanimo ako padayon naga-uban
Hangtod sa kapusoran ning kalibutan

Adunay Laing Langit

Adunay Laing Langit
By Genamos_US of Washington DC, USA

Adunay koy nakaplagan nga laing langit
Sa nasum-okan kung dapit
Dili mo kini makita sa dalan
Kay gitagu-an sa mabaga nga mga tanaman

Lab-as didto ang huyohoy sa hangin
Ug ang palibot sa kanunayng malinawon ug matahom
Adunay sad silay laing adlaw
Nga may talagsa-on ang bidlisiw
Ug mahinay nga kainit

Bughaw nga kalangitan
Puti og abohon nga kapanganoran
Patag og luag ang kapatagan
Inubananan sa nagikis-ikis nga agianan

Walay igsapayan kung pughaw ang kalasangan
Ug mga amang nga basakan
Ang kahilom sa palibot inanay suliran nakalimot
Nga kansang mga tanom nga ihalas
Bulak nga naputos sa mga kolor
Nga dala og inspirasyon ug kahinam

Ang mga hugong sa mga buyog
Daw usa ka melodiya nga giduyogan sa trumpeta
Ang mga dahon lunhaw
Adunay say nanga pagba nga mga laya

Pagkaanindot sa mga talan-awon
Maka-ikag sa atong pagpamalandong
Kay ang mga huni sa kalanggaman
Nga nagkuros sa pag-awit
Kay didto ko natagamtaman
Nga na-a diay laing langit

Ang Udyong (The Arrow)

Ang Udyong
By Genamos_US of Washington DC, USA

Akong gibinat ang lambo ning akong pana
Aron ipunting ang udyong ngadto sa kalikopan
Ug sa kalit akong gibuhi-a ngadto sa kahanginan

Aron akong maaninaw nga nahulog ngadto sa kalibutan
Nga wala ko masayod ang iyang padulngan
Sa iyang katulin nilupad nag-inusara
Nga akong gisunod kung asa itugpa

Samtang sa iyang kakusog ug kalayo
nga wala nako masundi ang iyang paglupad
Akong gihanggap ang lab-as nga huni sa hangin
Nga ako nagtu-o nga kadtong udyong nga akong gibuhi-an
nahulog kadto sa kalibutan

Kung nakagukod palang sa akong mga panan-aw kadtong
igmat og gawasnon kung udyong
Tingali akong makit-an ang iyang sangkoanan
Ug kaha madungog ang iyang mga hadyong sa paglupad

Ug sa akong kakapoy nilugsong ko sa patag
Aron sa pagpangita niadtong udyong kung nasaag
Ug sa dili layo ning akong gibarogan
Akong nakita kadtong udyong nga akong gikabalak-an

Akong gisubay ang mga huni sa iyang mga paglabay
Gikan sa iyang pagsugod lagbas sa iyang utlanan
Ug didto ko nakita ang naghigda kung higala
Nga nagpaabot sa iyang tag-iya.

Ang Kaanyag

Ang Kaanyag
By Genamos_US of Washington DC, USA

Hiyas nga padayong gipangandoy
Ang dughan ko nagpanaghoy
Sa hiyas nga padayong gikagubtan
Sa mga mata ning kalibutan

Ngano man kaha kitang tanan nangandoy
Dili pa ba igo ning mga pulong giasoy
Kining hiyas nga gasa gikan sa Langit
Nga tarongon sa pagdala aron kini magamit

Dili pa ba igo kining atong kaanyag
Nga usahay ang dughan kita mahisalaag
Sa mga pangretoke kita ang nagpili
Nga ang kamatuoran lisod mabakwi

Kining kaanyag sa atong panagway
Dili kini basihan sa atong kalipay
Kon dili usa lamang kini ka tamla
Sa atong pagkatawo dili ibaliwala

Atong nakita ang katahom ning kinabuhi
Sa matag sook ang mga butang nagkalahi-lahi
Ngano man padayon kita nangita sa kahulugan
Nga kining kinabuhi may igo naman padulngan

Sud-onga kanang mga bata
Malipayon nga nagduwa
Ilawom sa kainit sa adlaw
Mga hudyaka walay pagkahilaw

Ang nalukot nga mga balod
Sa daplin bayabayon kini gianod
Ang mga tingog sa kalanggaman
Daw melodiya nga dili ko malimtan

Ang mga kalidoskopyo sa kinabuhi
Ang ilang mga panagway managlahi
Kay kining tanan giplano sa kahitas-an
Aron ang kaanyag sa kinabuhi atong mapuslan

Dili pa ba igo kining mga tubag
Mga kahasol sa hunahuna nabutyag
Kay kita nahadlok agawon ang atong pagkabatan-on
Sa paglabay ning panahon uban ang kunot sa pangidaron

Ngano?

Ngano?
By Genamos_US of Washington DC, USA

Nihangad ako sa tiilan sa langit
Aron magabakho sa sabakan sa mga panganod
Ug aron akong gihikyad kining mga pangutana
Pamasin madungog akong mga pangamoyo ngadto ni Bathala

Akong gisubay ang mga kagahapon
Aron sa pagkaplag sa mga tubag niini
Kung ang haring adlaw nga nagmaya sa tumang kasidlak
Mao sab kini ang akong gibati sa tumang kalipay

Dili ko masabot kining akong dughan
Kung unsa ka lawom kining kabalaka
Kung ako kaha kining ihilak?
Malimot ba kaha kining akong dughan

Kung akong kining ikatawa?
Makunhuran ba sab kining kasakit
Akong nadunggog ang mga bakho
Sa hangin nga nidakpis sa akong mga aping

Ug akong mga mata nilugmaw
Ang mga luha sa kamingaw
Nihonghong kanako ang kalinaw sa palibut
Aron tapigan kining akong pag-inusara

Ang akong kasingkasing natipak
Sa tumang kasobo sa imong pagbiya
Padayon pagdagayday ang akong mga luha
Samtang akong gigunitan ang imong larawan

Niduyog ang kalangitan sa nagbangutan kung dughan
Akong nadungog ang mga huni sa mga kalanggaman
Nga nagdala og paglaum ug kadasig
Susama sa mga agos sa tubig nga nagdala og kinabuhi

Ngano man kining akong gibati
Sa pagka dili masabot
Unta, gipugos ko naman ikaw akong hikalimtan
Kadtong mabulokon tang kagahapon

Ang imong panagway sa kanunayng dakong buhi
Ning nagsubo kung panumduman
Bisan pa wala kana sa akong kiliran
Ang imong alimyon padayon kung gipangita

Ngano man akong iawit kining mga kaguol?
Kay ngano man kini akong ihilak sa tago?
Aron ba tak-upan kining mga kalisod?
Kay kining natagpilaw kung mga pangutana
Wala ko masayod kung kanus-a kini mahigmata

Matahom nga Babaye

Matahom nga Babaye
By Genamos_US of Washington, DC, USA

Matahom nga babaye gulwa dinha ug makigduwa
Ipasundayag ang imong sulod nga mga bahandi
Ang kisdap sa imong mga mata
Ang imong kinaiyanhon nga mga lakaw
Imo kung gibihag sa mga busilak sa imong kahinaman

Wala ka manginahanglan sa mga matag bag-ong urog
Ug mga mahalon nga alot
O kaha mga mogilak nga mga dagko nga brilyantes
Kay imong kaanyag makabuta sa akong panan-aw
Ikaw nasayod sa imong emosyon ug kahuyang

Sa imong kapasidad ug katakos
Nga modelo sa katilingban
Ang Maria Clara sa modernong panahon
Dili ka dali matugaw sa mga hagawhaw
Sa mga dilang masalaypanon

Ikaw mapasagaron sa mga panahom sa uban
Ikaw andam maminaw kanila
Nga walay pagduhaduha tanan himong higala
Kay ikaw nahibalo sa imong abilidad
Bisan may utlanan wala ikaw mobalibad

Kaanindot nimo sud-ongon
Nga kansang kaanyag talagsa-on
Ikaw ang lamdaman sa uban
Magdadasig sa mga ulit nga mga tawo
Kay ang imong kalag napuno sa dalisay

Matahom nga Babaye
Dan-agi kining akong mga mata
Aron makita ko ang imong lunsay nga katahom
Hatagi kining akong pangindahay
Kay ikaw makahatag kanako og kalipay

Ang Kinabuhi walay timik sa kahulugan

Ang Kinabuhi walay timik sa kahulugan
By Genamos_US of Washington, DC, USA

Kung naay panahon ang ugma damlag nga tapakan
ang mga kahasol aron kini taposon sa dayon
Pero kadtong walay mga purohan nga mga pagla-um ug mga kasub-anan
Nga gitugbaw nalang sa amping sa langit

Kung gusto nato lantawon ang atong ugma aron makita ang kahayag niini
Ngano man dili nato taga-an ang paninguha sa pagkaplag sa kamot sa paglaum
Kining mga pagduda og kangitngit nga gibutangan sa atong pagduhiraw
Bisan pa kining atong dughan sa sobrang nanghingutas sa kabug-at og kahapdos

Kining tanan usa lamang ka pagsulay ning atong kinabuhi
Atong hatagan og higayon ang pag-ampo sa pagbulong
Aron ang tamboanan sa atong kinabuhi mabuksan sa bag-ong banagbanag sa paglaum
Salamat ni Bathala sa iyang mga saad bisan pa kining pagpanakit sa atong pangisip og kalag bunga sa mga pagsulay

Ang atong bugtong pagtoo kaniya magpabilin nga lig-on og matinod-anon
Kung may anihon nga mga lugas nga giayo sa pagtikad sa kamot sa langit
Mao sab kini ang atong dangatan sa atong kinabuhi nga puno sa kalipay og katagbawan

Pasaylo ug Pagsalig

Pasaylo ug Pagsalig
by Genamos_US of Washington, DC USA

Ikaw ang nagtukmod kanako
Nga tukoron pagbalik ang haligi ning atong gugma
Sa nangagusbat kung kalibutan
Nga napuno sa kamingaw
Nga andam gam-on pag-usab
Kadtong atop sa atong pagsalig
Ning nagduhiraw tang kasingkasing
Nga puno sa kahigwa-os ug kasakit

Kining atop ning pagsalig
Maoy kini andam molandung kanato
Sa matag bundak sa uwan og taligsik
Sa kalisdanan ning kinabuhi
Buhi-i kanang mga kabalaka
Ug kahigwa-os sa imong kasingkasing Ug hunahuna
Aron mo ako masabtan ning akong dughan

Bisan pa kini nahunlak ang pondasyon
Sa atong gugma sa niaging panahon
Tugoti kining akong dughan sa tumang kahidlaw
Sa pagsangyaw pag-usab sa gugma ko kanimo
Nga walay pagkapalong
Paminawa kining mga tinagoktok
Sa akong kasingkasing sa kanimo gihidlaw
Abilihi ug dawata kining akong dughan
Sa walay pagduha-duha akong pinili

Akong ikulit kining tim-os kung gugma
Sa dagway sa langit
Ug andam ko kini banhawon
Ang nahikatulog nga pagbati
Nibalik ako aron sa pagtuman
Ni-adtong pakyas nga mga saad ug panumpa
Nga dugay nang imong gikalimtan

Dili ko itogot kining higayon
Nga buhi-an ang kamot sa gugma ning akong dughan
Sa pagkalagas ug pagkahanaw
Dawata kining akong pasaylo
Sa nabuhat kung kasaypanan
Bisan pag imo kung lumsan
Sa imong mga hilak og danguyngoy
Andam ko kini pagkabasulan
Ug dawaton sa walay pagmahay
Kay mao kini ang bugti sa lingla
Ning masalaypon ug nahisal-ag kung pagbati

Lubog nga Padulngan

Lubog nga Padulngan
By Genamos_US of Washington, DC, USA

Naay gyud dapit kung asa ang tumoy ning aseras
Sa wala pa sugdi ang bag-ong utlanan ning gisubay kung dalan
Sa mga daplin akong nakita ang miturok nga mga lunhaw og abuhon nga mga sagbot uban sa mga pinutol nga mga puno-an sa kahoy
Ug ang adlaw niluta sa pughawng langit nga nisilaw sa tumang kapula
Samtang ang mga langgam sa bulan nagpahulay sa paglupad
Aron sa pagpabugnaw sa lab-as nga huyohoy sa hangin ngadto sa kabukiran
Wala koy nakita bisag usa ka kahoy nga gipasilungan sa mga langgam sa ilang untang pahulayan, gawas lamang sa mga bulak og tanaman nga gitisok sa mga ka-ang

Kung kining dapit atong ibilin uban sa tayhop sa itom nga mga aso gikan sa mga sakyanan ug gam-anan
Kung atong lantawon ang kamot sa ting-usbawan nga kansang palibot gialirungan
Sa tag-as nga mga dakbalay ug huot nga mga agi-anan
Makalingaw ang mga talan-awon kay ang mga suga sa kagabhion inanay sapag hatag ug amag sa mga lumalabay
Ang mga punsisok sa mga tawo nga nag-iyahay sa paglakaw sa ilang padulngan
Mao kini ang dagway sa ting-usbawan

Ug sa laing panid ning hunahuna, kay ang tingog sa kalikupan gihimo namang amang
Sa matag singgit sa modernong dakbayan kay ang pag-usbaw mao namay unang gi-atiman
Kung wala tay bugtong buhaton aron sa pagpa-uli sa panagway sa kina-iyahan
Nan dakong purohan ang muabot nga kadaot ning atong yutang natawhan
Sa pagpasipala og pagpasagad sa atong pag-alagad
Kay ato naman gitak-upan ang ngabil sa kalikupan
Ug ako nakapanghupaw sa pakyas kung mga panglangtaw

Kung mo-abot nga gani ang lawom nga kagabhion kining dalan kung giagian
Mahimo kining paw-ang ug hilom ang mga salidsid
Ang kangitngit sa mga suok didto sa daplin sa dalan tima-an nga walay nag-atiman
Mao kini ang hulagway sa mga kadalanan ning syudad kung natawhan
Nagkagubot lamang ang mga katawhan kung asa molabang sa mga kadalangan
nagdali sa ilang mga padulngan

Aginod ang akong paglakaw bisag hinay ngadto padulong sa nag-udyong nga sinyal
Nga akong gisubay kung asa kaha ang tumoy ning dalan nga bag-ong gi-ablihan
Kung hain kini wala ko masayod kung unsay utlanan
Unang nasayod kadtong mga katawhan nga kanunayng nagngagi ning dalan kung gikahinaman
Kay ang tumoy ning gisubay kung dalan kay mao man ang nagahasol ning lubog kung padulngan.