Ang Panuhot

Ang Panuhot
By Genamos_US of Washington DC, USA

Naglain ang iyang kabuhi
Sa lawas niya gipamati
Ang dagway nag-aslom
Ang sakit iyang giluom

Naglingkod lang sa daplin
Ang haplas iyang gitak-in
Gisakitan sa iyang tiyan
Sa panuhot siya nadak-an

Gipaningot og bugnaw
Nangluspad og gitugnaw
Sa dili masabot na gibati
Pun-an sa otot nagpitipiti

Galuya ang iyang lawas
Ang adlaw niya gidimalas
Gapawpawng ang panan-aw
Mga mata nagsiga nagtuaw

Galaylay ang iyang abaga
Ang kagutom giagwanta
Namognaw ang mga kamot
Apil ang lapa-lapa gipaningot

Dili lalim kining panuhot
Daghan ang naglagot
Napasaran sa gutom o dili
Sa pagkaon kita dili mamili

Ihigop lang sa init na sabaw
Apil ang bugnawng bahaw
Dili kalimtan ang pamahaw
Aron halayo kita sa kakuyaw

Kay ang panuhot dili magsaba
Ang kalisod kusog pa sa baha
Busa ang lawas paga-ampingan
Kay mao ra ang atong puhonan

Si Toro, Ako Ug Ang Kahaponon

Si Toro, Ako Ug Ang Kahaponon
By Genamos_US of Washington DC, USA

Pagkainit gayud ning among dapit
Si haring adlaw kanamo nanghagit
Ang analisngaw sa yuta nagsyaagit
Ang among mga singot pagkapilit

Kutas paminawon ang tumang kainit
Kay panahon na gayud sa ting-init
Ang bugnawng tubig lang ang maidalit
Sa lawas makatagbaw na dili mapalit

Mingaw na kaayo ang mga kabukiran
Dili susama na sayo pa ang adlawan
Mabugnaw na huyohoy ang kasagaran
Akong paminaw dili tanto kita kutasan

Ang pughawng langit nindot tan-awon
Mga panganod nahinanok sa katulogon
Panan-aw gianod sa kapunawpunawan
Nagkalandrakas na kolor siya gihabolan

Nindot unta kon ang hangin mabugnawon
Apan lagi dili susama kaniadtong panahon
Gipaabot ko ang paglandong sa kahaponon
Aron tiwason ang naundang kung bulohaton

Mipahulay mi ilawom sa punoan sa mangga
Kuyog ang kinakusgan kung kabaw nagluya
Si Toro miligid ug mipahulay wala kaagwanta
Ug ako nanghuyatid ug gipiyong ang mga mata

Samtang gipaminaw ang mga kinanaas sa palibot
Ang mga bulak ug tanaman nangalisbo sa kahumot
Nalingaw ako sa mga simponiya sa kalanggaman
Ang tingog sa gangis ug ang taghoy sa tanaman

Maayo gani nagsul-ob ko og kamisin ug purontong
Matod pa ni Noy Teban mura kuno kog nakalugsong
Kay hayahay ang gipamati murag bugnawng erkon
Na ang atong bugan ug ilok dili tantong panington

Simple lang ang kinabuhi dinhi sa probinsya
Halayo sa mga alingogngog sa mga pabrika
Lab-as pa ang hangin sa kanunayng mahanggap
Ug lagyo ra ang mga silingan ug sa tudlo maihap

Gihubagan

Gihubagan
By Genamos_US of Washington DC, USA

Ngano si Dodong nagtakiang?
Kon tan-awon murag napiang
Naglisod siya sa paglihoklihok
Ang nawong murag nahadlok

Giduol ko siya ug gipangutana
Ang kalisod murag giagwanta
May hubag kuno siya sa bugan
Murag sa humigas na pinaakan

Kun imong tanawon siya molakaw
Daw gibunalan sa bugoy na opaw
Motakingking daw murag nagharag
Kay gisakitan diay sa iyang hubag

Nagsugod kuno sa gamayng katol
Inubanan na gamayng kangolngol
Gitambalan sa ambularyo og ityol
Apan sa sakit gihapon siya gihasol

Mga istambay siya gibugalbugalan
Kay mura daw siya og napus-an
Ang sakit na dili daw kabayran
Puno sa kahasol nga hilabihan

Ako siyang gitambagan sa hilom
Basin maimpiksyon siya molagom
Makigkita siya og doktor sa ospital
Basin antibiotic lang ang itambal

Ang hubag ug sakit dili gayud ibaliwala
Sa lawas kanunay kitang magpabakana
Ang himsog na kinabuhi ang atong alas
Aron mahilayo kita kanunay sa dimalas

Ang Tambag Ni Ingko Eking

Ang Tambag Ni Ingko Eking
By Genamos_US of Washington DC, USA

Ang kinabuhi sa tawo daghan og dagway
Nakigharong sa mga suliran ug pagsulay
Gibuhat ang tanan aron walay magmahay
Gipaningkamotan kab-oton ang  kalipay

Ang kalibutan naputos sa mga lingla
Sa atong mga kahigalaan ug pamilya
Walay gipinig kon asa kita ibanlas
Sa mga kasakit ug kalipay kita itipas

May mga panahon sap-ongan atong mga mata
Apil ang atong kasingkasing na pahilumon kita
Basin tungod sa gugma o kalooy ang hinongdan
Kay ang sayop himoon man og insakto sa uban

Kini ang hagit sa kinabuhi kitang gipuy-an
Nagkalainlain mga solusyon atong sulayan
Mga tambag sa atong pamilya o suod sundon
Kon mahitugma ba kini sa atong sitwasyon

Apan lagi kining tanan anaa ra gayud nato
Ang pinal na desisyon kon unsa atong iduso
Timbangtimbangon gayud ang matag lakang
Ug buksan ang hunahuna bisan kini kimpang

Ang tanang suliran adunay kasulbaran
Ang pagpailob ang atong pagahuptan
Ang paglaum ug hugothugot na pagtoo
Sa kaugalingon ug sa Dios kita mahaylo

Ang pag-ampo nato kanunay ngadto sa langit
Aron mga suliran dali ra mahanaw inig sampit
Ang kalinaw sa hunahuna ug kalipay mouban
Aron ang sakit sa dughan dili kita mahidutlan

Mentras buhi pa ta sa ibabaw ning kalibutan
Mga pagsulay, kasakit ug kalipay kita giubanan
Kay anino man gayud sa kinabuhi ang mag-antos
Ang pagsakripisyo ug pailob aron kita masantos

Busa magpadayon kita sa pagpakabuhi
Bisan sa panahon kita kanunay nagpuliki
Ang disiplina ug pagpaningkamot ang hinagiban
Aron ang kinabuhi lanoy og may igong padulngan

Ako Ug Ang Buwan

Ako Ug Ang Buwan
By Genamos_US of Washington DC, USA

Ang alindong nagkatawa sa langit
Ang kalibutan naputos sa kangitngit
Naghatag og dan-ag sa kagabhion
Ang kahayag niya nga talagsaon

Ang panagway sa mga bata madasigon
Nagtan-aw kaniya uban ang mga bitoon
Ang iyang gilak nagtimaan siya magarbohon
Kay kidhatan sa mga bitoon na mga garaon

Gibalik ko pagtan-aw ang akong kabataan
Magduwaduwa og tubigtubig sa tugkaran
Magtagotago mao sad ang among kalingawan
Kay hayag lagi ang kalibutan gumikan sa buwan

Apan dili tanan ang nalipay kon buwanon
Labi na ang mga mananagat ang pasultion
Mingaw ang lawod sa mga isda na kuhaon
Magsud-an nalang intawon sila og kinason

Kon wa ang buwan ang kalibutan masulob-on
Kay di kita makasinati kon unsa ang kagabhion
Puro lang adlawan ang atong pagatan-awon
Way pagtaob ug maghunas sa dagat subayon

Nindot ang kalibutan kay balansi ang tanan
May pagsubang ug pagkasalop sa adlawan
Gasa gihatag sa Dios kanatong mga katawhan
Ang kinabuhi susama sa adlaw ug ang buwan

Nagkalainlain man ang atong mga opinyon
May mga nalingaw ug nagbagolbol intawon
Ang dan-ag sa buwan nga nindot tan-awon
Inubanan sa bugnaw ug hilom na kagabhion

Ang Gilangaw Na Gugma

Ang Gilangaw Na Gugma
By Genamos_US of Washington DC, USA

Pastilan gayud si Dodong naglakaw
Minghoy ang dagway nanghupaw
Lawom ang pangisip daw giuhaw
Sa mga pangutana murag nahilaw

Walay tumong ang iyang paglakaw
Kon asa gianod ang iyang panan-aw
Murag ang dughan naagian og huwaw
Kay sa gugma kuno siya gisurambaw

Si Inday kuno milakaw sa way pananghid
Kon may laing Dodong ba ang nakasaghid
Mga pasumbingay sa iyang hunahuna
Mga kabalaka ug tubag kaniya gipangita

Nagkaupos na ang kainit sa kahaponon
Walay imahe ni Inday ang nagpaingon
Ang kamingaw sa gibati nga talagsaon
Mga luha midagayday puno sa sugilanon

Nahunlak ang mga gipangandoy ug damgo
Si Dodong  gilangaw  nga wala siya makatuo
Sa gidangatan niyang kasakit ug pagsulay
Nanghinaot nga temporaryo ug molabay

Miabot  na ang panagway sa kagabhion
Tingog sa gangis ug mangliw masulob-on
Miduyog ang dagway sa buwan ug bitoon
Ang nahigwaos nga dughan dili gayud sayon

Ang kalooy ang nagpasulabi sa kagabhion
Ang pagpailob ug pagsabot maoy tukion
Ang tanan adunay kinutoban ning kalibutan
Ang kinabuhi magpadayon dili ang katapusan

Hatagan gamay og panahon sa pagbangon
Sa pagkadugmo sa yuta dili kini pagaisipon
Usa lamang kini sa mga hagit sa kinabuhi
Matag usa kanato may kapalaran kitang gipili

Gikapoy Ug Gilaay

Gikapoy Ug Gilaay
By Genamos_US of Washington DC, USA

Gilaay ako karong adlawa
Gikapoy na wala ko tuyoa
Maghigdahigda sa kama
Sa kakapoy na dili madala

Basin maminaw akog sonata
O Kon dili maminaw og drama
Buhian ko ang mga kabalaka
Kay ang kakapoy giagwanta

Kon adunay manawag pasinsiya
Kay di nako tubagon bisag kinsa
Magbilin lang siya og mensahi
Kon kaniya murag importante

Daw miduyog ang kalangitan
Si Haring adlaw na gimug-otan
Sa mga panganod nga nakuratan
Kay gibundakan sa dakong uwan

Kaon ug katulog lang pagabuhaton
Kining adlaw kanako nga talagsaon
Biyaan usa nako ang mga bulohaton
Ug kalimtan ang mga kabudlay karon

Gusto unta ko mag-eksersays
Ganiha unta tong pagkaala sais
Apan wala ko kasayo og mata
Kay gihawiran sa akong kama

Gihuyatid ko ang mga tiil ug kamot
Nagpaminaw sa kamingaw sa palibot
Gihunahuna ang pamahaw na humot
Kon unsay isud-an sa bahaw kung dukot