Lingawlingaw Sa Hunahuna
By Genamos_US of Washington DC, USA
Inday sa akong hunahuna
Ang dughan ko pagkabanha
Ang imahe mo dili mawala
Sa imahinasyon nagduwaduwa
Matag gabii ikaw ang gidamgo
Sa imong katahum ako gihaylo
Mga pahiyom mo dili ikabaylo
Ang dughan ko sa langit misaylo
Gusto ko lang ikaw ikauban
Maglambiyong sa kalibutan
Layagon ta ang mga kadagatan
Aron ang gugma ta pagasaw-an
Susama sa nobela kung nabasa
Ang sugilanon napuno sa romansa
Mga pagsulay gihagit ang gugma
Gumikan sa gibati nga pagkalamia
Wala gayud ako masayop
Ning hunahuna kung maaghop
Ang gugma nga mihangop
Sa kasingkasing ko mitaop
Gugma na ba kini matawag?
Ang dughan ko ang nagsabwag
Ang tingog sa gugma mitawag
Gilumay kanimo nagbaragbarag
Dili kuno ta ganahan mokaon
Bisag litson ang sud-an dili matulon
Hunahuna naglatagaw gibalon
Ang kamingaw sa kahaponon
Pagkaaligre gayud kung matinood
Mahilantan ang dughan maglisod
Kon kinsa kana si Inday naglingkod
Naghulat ni Dodong nakamatikod
Adunay gamayng panulti-on
Ang gugma kanato sulondon
Pagaampingan ug amomahon
Aron ang tawo magmalipayon
Lingawlingaw na dala ang tinood
Ning kahaponon kanako misulod
Nagpaingon ang kagabhion gitulod
Milakaw ang adlaw nga nangluod
Pagkapatislan ba ana nga gugma! Cute 'ni. Ganahan 'ko sa garay niini'ng imoha'ng balak. Tuod diay, nalimtan nimo'g butang ang "d" sa pulong "nangluod". :)
ReplyDeleteGanahan ko'g laag dinhe sa imoha'ng ganghaan kay anaa 'koy mga bag-o'ng pulong Binisaya nga makat-onan. Dagha'ng salamat kaayo, Eric.
Daghang salamat kanimo inday, Akong nalimtan gyud ang letrang "d" sa katapusan, :) Tigulang na gayud ning imong higala sa kahanginan. Daghang salamat kanimo sa kanunayng pagsunod.
Delete