Hain Kana O Gugma?

Hain kana O Gugma?
By Genamos_US of Washington DC, USA

O hain ka man nga gitawag na gugma?
Gipangita sa matag suok nga way sama
Daghan nang milabay nga mga katuigan
Malisod ikaw nga akong mahikaplagan

Sama sa maidlas nga bangaw sa langit
Kadali rang mahanaw ug way panamilit
Ang gugma kuno susama sa usa ka bulawan
Magpabilin masiga ang silaw sa katuigan

Apan matud sa uban ang gugma kuno tam-is
Kon masagol sa tim-os mong gibati iparis
Walay makapugong kon usa ang mohawid
Magpabilin lunsay kon unsay bati ipahid

Apan ngano man ang uban wala man makakita?
Sa gugmang gilauman sa katuigan nadismaya
Mga pagsulay ug hagit daghan ang nalambigit
Pun-an pa sa mga kasilag, hilak ug kasakit

Dili kini ang panagway sa gugma gihalaran
Taliwala ning tanan ang gugma may utlan
Dinhi ning yuta ang kinabuhi gikaluhaan
Sa kamot sa kausaban nga di gayud mapugngan

Kay ang gugma man gikan sa Dios
Ug ang tawo sa gugma kita gibugkos
Way luna ning dughan ang pagpanimalos
Kon gitamay man sa gugmang way pulos

Aninawon ang tanan aron kini masabtan
Di man magtugkad ang tubag ning kalibutan
Itugyan ngadto sa kahitas-an ang tanan
Aron mabatunan ang kalinaw ning dughan

Ang gugma mao kini ang atong hinagiban
Sa atong mga yangongo nga wala matuman
Mentras kon aduna pay paglaum gikuptan
Ang kinabuhi magpadayon murag sakayan

Magkilingkiling kon may balod sa pagsulay
Mao sab kini ang gugma kon dili molahutay
Magtimbayayong sa pagtimbang ang misakay
Aron dili matikwang ang gugmang giatay

Dili madismaya sa gugmang napakyas
Bisan may nagpabilin luhang nabanlas
Way undang sa paghigugma kita magbadhas
Aron ang gugmang nalumos mabuhi ug maluwas

O gugma hain ka man naglibotlibot?
Ning Febrero ang bulak pagkahumot
Bisan way hinigugma dili magsagum-ot
kay ang Dios wa gyud kanato malimot

SINULOG

SINULOG
By  Genamos_US of Washington DC, USA

Ang sayaw inubanan sa pag-ampo
Lakang atras abante gamay ug dako
Sa kamot ang kandila iwara-wara
Gilitok ang mga pag-ampo gitagana

Ang uban nagpiyong sa ilang mga mata
Gihalad sa Dios ang ilang mga problema
Ang uban naghilak naghangad sa langit
Na unta makuhaan ang ilang mga hagit

Gipangayo ang kalagsik sa panglawas
Mahilayo sa mga kakulian ug dimalas
Mga panata ug saad sa hilom ilang gilitok
Aron ang ilang mga kinabuhi dili samok

Adunay mga pag-ampo agi'g pagpasalamat
Sa grasya ug kaayohan sa kinabuhi nadawat
Kasadya ug kalipay ang tanan nag-ambahan
Nagsaulog ang Sugbo sa dakong kapistahan

Ang kadalanan nakalandrakas ang mga kolor
Sama sad namowak ang mga pagoda may balor
Ang mga parada ug sinina sa mga mananayaw
Mabulokon sama sa maanindot nga bangaw

Ang mga dagkong tingog sa tambol ug kombolata
Nagdahunog  daw nindot na sonata aron dasigon ta
Ang mga tumatan-aw nagatotok ngadto sa karsada
Kay molabay ang mga parada uban ang mga artista

Adunay mga manglawgaw magdala'g kasamok
Ang kamot sa mangunguot motugdon daw lamok
Kon masakpan sigurado gayud mabun-og
Daghan moambit kay sa kapungot gidaog

Daghan usab sa telebesyon nalang motan-aw
Mitagam sa kasamok ug duot-duot maglakaw
Basin unya ang bulsa masakdapan sa engkanto
Ang igpapalit unta‘g nila paniudto masakupo

Pit Senyor, Pit Senyor  kita magsaulog
Magsinulog sa dakong syagit ug kusog
Magbantay kamo kay daghan ang mga hubog
Magpabadlong sa kadalanan ug sila miduyog

Ang Nagduka Nga Sapa Uban Ang Gugma

Ang Nagduka Nga Sapa Uban Ang Gugma
By Genamos_US of Washington DC, USA

Ang kalinaw miduaw sa kalibutan

Nag-awitan ang mga kalanggaman

Mga dahong laya sa daplin nangalagas

Kay gitayhop sa hangin nga lab-as

Ang bugnawng huyohoy walay sama
Linaw ang tubig na pagkatin-awa
Kay gidan-agan sa nangidhat nga adlaw
Samtang ang pughawng langit nagtan-aw

Dili halayo sa akong panan-aw
Ang punu-an sa mangga nga lunhaw
Kaniadto gamay pa ang punu-an
Matag hapon among pagkaduawan

Sama sa hangin ang panahon milabay
Ang kausaban sa palibot ang gisaysay
Gianod ang hunahuna sa kagahapon
Didto natawo ang gugmang naulipon

Ang sapa maoy saksi sa maong gugma
Duha ka kasingkasing nga nagkahiusa
Mga bahakhak, talidhay ug katawa
Gisawhan namong duha sama sa grasya

Damgo, kalipay ug mga saad gisugilon
Way paglubad kinabuhi nga malinawon
Apan wa ko damha ang panahon nagluib
Nahunlak nga pagbati dili ko matukib

Siya mibiya ug ang suwat maoy miasoy
Gibasa ug ang kamatuoran walay kalooy
Giam-aman ko ang kasingkasing sa pagsabot
Bisan ang dughan nagdumili wala mahimoot

Sa iyang paglakaw balon ang akong pagsalig
Matag adlaw pag-ampo kaniya akong iparayeg
Bisan way kasigurohan kon kanus-a siya mobalik
Dawaton ko ang kamatuoran sa gugmang gisawilik

Bugtong hadumanan ang nagduka nga sapa
Sa akong paghanduraw kaniya bisan siya wala
Nagpabalin malaumon sa gugmang gipanaad namong duha
Nagpaabot kaniya sa daplin sa sapa uban ang mga luha

Didto Sa Buwangan

Didto Sa Buwangan
By: Genamos_US of Washington, DC USA

Mga yangongog ug mga kasikas sa palibot
Sa matag daplin mga nawong ako nahimoot
Nagkalandrakas ang imahe sa mga panagway
May nagtingsi, naminghoy apan way panudlay

Abi ko gikabuhi kay nangluspad man nagpungko
Pildero diay sa sabongan maong nagdukoduko
Timaan nga nagmahay sa iyang gipustahan
Narimatsi hinoon ang iyang panudlanan

Alegre kaayo ang matag palibot bisan og gubot
Mga sabongero nagdala sa ilang mga abobot
Nagbitbit sa ilang manok hiniktan nga pinayongan
Hadlok sip-onon ang sunoy kay sa nahingtungdan

Porbida kon mao kining kahimtanga
Ang ruydahan napuno sa mga bisita
Nagpaminaw kon asa ang kusog nga sultada
Sa meron o wala mura ang mga mata ni Angelita

Mga katawhan murag adunay gipaabot
Dili mo masabot mga nawong gipaningot
May uban mga nawong murag katahapan
Murag mangunguot sa Colon ug Kamagayan

May nagsinggit singit nga usa ka sugarol
Pangag ra ba apan lawlaw ang iyang purol
Nangugat namasyada sa iyang pusta
Abi ko kadto nandina siya og init na bingka

Sa dakong kaikog ug siya nanabon nagbarog
Nangita og kontra sa pusta niyang dili matarog
Pinatabon pa sa iyang kamot murag may giyamyam
Nag-inusara nagyawyaw sa sunoy ni Inday Miriam

Busa kamong mga Inday ug Undong nga sugarol
Hunahunaon ang salapi nga dili daling mapasol
Ang pamilya maoy unahon kay sa dakong bisyo
Mag-ampo kanunay sa langit ug sa atong Ginoo

Dungga Ang Among Mga Pag-ampo Senyor Santo Niño

Dungga Ang Among Mga Pag-ampo Senyor Santo Niño
By Genamos_US of Washington DC, USA

O Senyor Santo Niño, naga-ampo kami kanimo
Ilawom ning dughan nangayo kami og pasaylo
Ikaw ang among tingpanalipod ug kadangpan
Sa among mga suliran ug sa mga kalisdanan

Ikaw ang among Patron ning among dakbayan
Sa Sugbu, sa Pilipinas ug sa tibook kalibutan
Ikaw gayud ang milagrosong imahe nga balaan
Sapwanga ang among kinabuhi ug kanimo itugyan

Tan-awa kining among mga kasingkasing O Ginoo
Na makalikay sa mga katalagman ug mga peligro
Lamdagi kining among mga hunahuna sa kanunay
Sa pagbuhat og maayo ug sa kasaypanan mahalikay

Tagai kami sa igong kabaskog sa matag adlaw
Aron ipadayon namo ang Imong pagbuot ug laraw
Ayaw kalimti ang among mga tagsatagsa ka pamilya
Nga nagaampo Kanimo Sa Imong proteksyon ug grasya

Hupaya kami sa imong malumo nga kasingkasing
Aron ang among kinabuhi padayon sa pagbagting
Bendisyoni kining among mga hunahuna ug pulong
Aron ang grasya sa langit nga kanamo mopasilong

Dasiga kining among mga kasingkasing sa paghigugma
Dinha Kanimo ug sa tanan mga tawo na walay pagduhaduha
Tabangi kami isalikway ang mga yutan-ong hiyas ug batasan
Aron mahiduol Kanimo ug sa langit puhon kami mahiuban

Tabangi kami nga makapugong sa mga tentasyon
Mahilayo sa mga kadaut ug malaw-ayng bulohaton
Hatagi kami sa igong kaisog nga makigbatok niini
Aron ang among kinabuhi maluwas ug adunay bili

Himoa kami nga wais sigo sa imong kabubot-on ug balaud
Ug dugangi kining among mga pasensiya sa matag kalisod
Papasa kining among pagkahakog sa mga bahandi ug kuwarta
Ug ipuli ang bertud sa pagkamahatagon sa walay pagkaluya

Hinloi kining among mga lawas, hunahuna ug kalag sa mga sala
Nianang imong dugo nga mibanaw sa krus ug kanamo ipadala
Ikaw gayud  O Dios ang hingpit nga dalan sa kamatuoran
Ang kahayag sa among kinabuhi hangtod sa kahangturan

Sa Tumoy Ning Mga Kabalaka

Sa Tumoy Ning Mga Kabalaka
By Genamos_US of Washington DC, USA

Wala ba kamo mahibulong sa panahon karon
Matag abli nato sa radyo ug kaha sa telebisyon
Mga kasamok sa kalibutan mao ang sugilanon
Dili mabangbang ang mga kabalisa sa panahon

Matag pakli nato sa pahina sa pamantalaan
Nagbalikbalik nalang ang mga gipanghisgotan
Nagbansiwag ang mga yangongo ug sumbong
Katawhan batok sa goberno dili na ikahibulong

Katalagman, gubat man ug sakit ang mikanitkanit
Kini ang anino sa kinabuhi sa tawo na kita gihagit
Mga tilimad-on nga nagtangag ug dakong tubag
Mga tagnatagna ug mga pangagpas nagbansiwag

Kon may kamatuoran ba ang nahisulat sa bibliya
O kaha ang mga pamahayag sa habig sa siyensiya
Kon hain kanila ang may kahulogan alang kanato
Labi na sa mga nakaapekto sa atong mga pagpuyo

Nahinumdom ako kaniadto sa akong kabataan
Na gikauban ko pa ang akong mga katigulangan
Matud pa sa mga panahom nga ilang gipagawas
Duha ang dagway sa kinabuhi di kita kalingkawas

Wa ko kaniadto mahisabti ang ilang mga pasumbingay
Sa akong dalunggan ug hunahuna yano kung gipalabay
Wa ko matimbangtimbang kon aduna bay dakong bili
Ug karon inanay ang kamatuoran mihalang sama sa sili

Nan asa naman kita mopasilong sa atong mga kabalaka?
Midulot sa akong kinabuhi nangita sa kalinaw tang gidala
Kon sa kalibutan nako ipiyal ang akong ugma damlag
May madawdaw ba akong kasigurahan ang modan-ag

Apan kon akong ihangad ngadto sa pultahan sa langit
Ang hugot kung pagtoo ug pagsalig Kaniya akong idalit
Uban sa mga pag-ampo ug pangamoyo sa kahitas-an
Kining akong mga kabalaka nga gidala makuhakuhaan

Dili ko man matugkad ang mga tubag sa akong kabalaka
Gisalig ko nalang sa kahistas-an ang tanan ug pangaliya
Ang Dios ang bahala magdala kanako sa dalan sa kahayag
Kay dili mapugngan ang mga panghitabo sa pagpadayag

Si Esyot Nakapisos

Si Esyot Nakapisos
By Genamos_US of Washington DC, USA

Mga sinul-ob nga sinina og pantalon
Sa planggana nagtapon-og ang labhonon
Si Esyot nagkapuliki kon unsay unahon
Kay si Misis niya wala nay sul-obon

Nagtabisay ang mga singot ni Esyot
Sa daplin intawon puno sa bagotbot
Mga mata gasiga nga murag napungot
Sa yawyaw ni Misis nga wa pa mahurot

Kay si Esyot diay gahapon pa gisugo
Nisibat sayo wala pa gani kono maligo
Nagdalig yampungad didto sa tigbakayan 
Kay kusog kono ang sultadang nadunggan

Nagkagubot ug nagkayagaw ang ruydahan
Tingog sa mga sabongero maoy madunggan
Mga sunoy nagpabuhagay sa ilang tingog
Gipasikadsikad aron molabok konog kusog

Ang uban sa daplin nagtingsi nagtan-aw
Sa ilang mga manok gikuptan nalingaw
Nagpahambogay sa ilang mga nahibaw-an
Kay adunay konoy napta silang gitamdan

Wala magdugay si Esyot miuli nga minghoy
Kay iyang puhonan gitilapan ug nasyakoy
Mao diay si Esyot wala ganahi manglaba
Kay gidabodabohan diay ang iyang bulsa

Nakatulog si Esyot nga naghunahuna
Sa mga bulohaton wala magpakabana
Miabot nalang si Misis gikan naninda
Si Esyot naghagok kono dili maagwanta

Gipangita ni Misis ang hiniktang manok
Sa matag butag mopokaw kaniya motoktogaok
Apan ang kamingaw sa palibot maoy miabot
Mao nalay naabtan niya ang bakanteng hikot

Pagkalawgaw gayud ning estoryaha
Ang matag magtiayon unta magkahiusa
Sa kinabuhi ug mga damgo magkombuya
Aron ang kaminyoon dili madisgrasya

Ang uban nagasulti nga lingawlingaw ra
Apan basin kita sa kadaot mataghapan ta
Ang lingawlingaw nahimong inandan
Malisod undangon kon kini mahinaykan

Busa ang bisyo dili gayud makaayo
Ang kalinaw sa kinabuhi di ikabaylo
Maglikay aron ang kalisod modimano
Ibutang sa hunahuna kanunay ang Ginoo