Ang Estudyante, Bidyo ug Ang Unibersidad (Dili Pa Ulahi Ang Tanan)

Ang Estudyante, Bidyo ug Ang Unibersidad (Dili Pa Ulahi Ang Tanan)
By Genamos_US of Washington DC, USA

Mga pamantalaan, radyo ug sa kahanginan
Nagbansiwag ang balita sama sa gipistahan
Ang eskandalosong bidyo ang naugkat
Ang mga sugbuanon natingala ug nakurat

Apan sa unsang hitabo ug pagkabutanga
Ang ilang sekreto nakaipsot ug nag-una
Ang bidyo milupad sama sa bakunawa
Nga mibutho sa kalibutan na miguwa

Ang duha wala pa gayud makontento
Nakahukom na kuhaan nila og bidyo
Sa pagtimaan sa gugmang hilabihan
Nga naghubo sama ni Eba ug ni Adan

Duha ka managhigugmaay
Sa tam-is na gugma misulay
Duha ka mga pagbati gilumay
Sa lawasnong tawag nagtagay

Duha ka mga batan-on na gugma
Nagsinukliay sa ilang romansa
Sa pribadong lawak sila gidala
Nagpabuhagay sa gibati nagmata

Mga panagway puno sa kalipay
Sa gibuhat nila nga malaw-ay
Duha ka mga hunahuna unta maglikay
Sa bulohaton sa minyo sila nalukmay

Gitaho na 2 na katuig kuno ang milabay
Nagama  ang bidyo na puno sa pagmahay
Daghan ang mga nadamay ug mga napagan
Ang dungog sa ilang pamilya ug eskuwelahan

Dili nato husgahan ang ilang mga ginikanan
Sa gipangbuhat sa duha ka mga tinun-an
Gipaedukar nila sa relihosong tunghaan
Aron sa matarong ug sulondon matudloan

Walay tarong na ginikanan ang magtukmod
Sa ilang mga anak aron sila masukamod
Anaa ra gayud kana kanatong tanan
Ang kaakuhan sa dili pagbuhat ug dautan

Busa kitang tanan magmatngon
Ang kaulaw gayud dili masayon
Sa pagpanday balik sa kadungganan
Nga mahibalik ug atong panalaminan

Ato silang iapil sa atong mga pag-ampo
Ang kalinaw ug sa Dios pasayloon silang dako
Ang pagsabot nalang kanila sa ilang kasal-anan
Kay kinaiya sa tawo ang masayop ug kitang tanan

Dili nato sila tamayon labi na si Inday
Ang kadungganan niya sobra migamay
Bisag ulahi na ang pagbasol ug pagmahay
Apan aduna pay paglaum ang mangindahay

Kon ato man silang mga silingan
Ato silang tabangan paingon sa kaayohan
Kay nahitipas man sila sa maitum na dalan
Dad-on nato sila sa kahayag sa Diyos Amahan

Ang kinabuhi susama sa mga gapnod
Sa mga kasal-anan kita gianod-anod
Ang matag lingi ug lihok ning kalibutan
Aduna gayud kini kinutoban ang tanan

Si Tikyu Ug Si Inday

Si Tikyu Ug Si Inday
Genamos_US of Washington DC, USA

Aduna akoy na mahinumdoman
Sa mga nanlabay nga katuigan
Kabahin sa among silingan
Ang kinabuhi nila pagahisgutan

Si Tikyu ug si Inday mga buotan
Bisag pobre malipayon silang tanan
Si Inday nga labandera ug tindera
Si Tikyu mangangasal usab siya

Si Tikyu ug Si Inday managhigugmaay
Nagkita kuno sila sa plasa nga gamay
Gumikan sa tinda ni Inday nga kalamay
Si Tikyu nga mipalit murag gilumay

Dinha kuno nagsugod ang tanan
Ning sugilanon sa gugmang hilabihan
Matud pa ni Inday, si Tikyu kuno siaw
Kay ang gugma kuno niya murag linogaw

Linogaw kuno kay simple ra og lami
Asin o asukar o bisag walay subak malami
Si Tikyu nga walay bisyo ug dili moinum
Sa kanunayng moulig sayo ug modumdom

Human sa trabaho si Tikyu maglong-ag
Mangitag isugnod ug mohapit molaag
Kay motan-aw diay ni Inday nga naninda
Sa tam-is na kalamay ni Inday nga gidala

Wala magdugay sila nagsinabtanay
Nagminyo ug nag usa ra kapanimalay
Si Tikyu nga misaad pa ni Inday
Ang gugma kuno niya molahutay

Mitakilid ang mga tuig ug nanambid
Si Tikyu ug si Inday kanunayng nag-ibid-ibid
Gitugahan silag duha ka mga anak
Sa tumang kalipay sila nagahilak

Si Tikyu ug si Inday mga kugihan
Nagtukod og negosyong gikalingawan
Si Inday nalingaw sa iyang baboyan
Si Tikyu ang nangunay sa ilang litsonan

Gipalad, midako ug milambo ang ilang negosyo
Nakapahuman sa ilang anak nga mao ilang gidamgo
Mapasalamaton sila sa Dios sa grasyang gipahat
Kay gibuligan sila sa kinabuhing haruhay nadawat

Mao kini ang estorya ko kaninyong tanan
Nanghinaot nga aduna kamoy nakat-onan
Sa kinabuhi, gugma, kakugi ug paningkamot
Uban ang pag-ampo ug sa Dios kita dili malimot

Ang Adlaw Sa Mga Kasingkasing

Ang Adlaw Sa Mga Kasingkasing
By Genamos_US of Washington DC, USA

Makalingaw gayud ning uban
Kon Pebrero na gani ang hisgutan
Usa ra gayud niini ang paingnan
Mao ang Adlaw Sa Mga Dughan

Buwan nga daghan ang magsalimoang
Sa gugmang hilabihan na makaboang
Kadaghanan kanila ang mag-atang
Labi na kadtong mga dughan nga piang

Mga Parke, Sinehan ug Pribadong dapit
Nagsaulog sila sa gugmang tam-is ug pilit
Apan adunay usab uban na mga minghoy
Gumikan sa kanhing gugma sila na pusoy

Halinon kaayo ang mga bulak ug tsokolit
Mga nanimpalad sa gugma ang namalit
Kasagaran kanila mao gyud kini ang idalit
Pahalipay nila sa ilang gugma nga nasignit

Pagatam-is ra ba sa gugma kung bag-o pa
Bulawanong kalipay ug pagbati sa usag usa
Apan sa pagtalikid sa panahon may motumaw
Mga kalisdanan ug pagsulay masugatan moduaw

Mga hilak, katawa, pagmahay ug gugma
Mga pagbati nga masinati sa kinabuhi ta
Walay perpektong relasyon ning kalibutan
Ang pagpailob ug pagpasaylo ang pagahuptan

Kay mao man kini ang atong bugtong hinagiban
Sa matag unos ug hagit ning atong mga dughan
Dili nato kalimtan ang pag-ampo sa kanunay
Kay ang Dios ang tinubdan sa gugma ug kalipay

Busa kitang tanan magpasalamat ngadto sa langit
Kay ang gasa sa Dios ang gugma kanato gidalit
Dili nato kini abusahan ug gamiton sa kaboang
Aron ang kinabuhi himsog ug walay masayang

Ikaw Ang Ginasampit Ning Dughan

Ikaw Ang Ginasampit Ning Dughan
By Genamos_US of Washington DC, USA

Ikaw ang tinubdan sa gugma kung dako
Bisan pa ang gugma mo wala nay pako
Milupad sama sa hangin ug nahanaw
Mga pagbati kung ngano ikaw nahilaw

Bisan karon wala kana sa akong kiliran
Mga handumanan nagpabiling bulawan
Mga kagahapon kanunayng nagauban
Matag adlaw dili ko gayud mahikalimtan

Ambot kung ngano gayud dili ikaw mawala
Ning dughan ko ug sa akong hunahuna
Pagatudloi kining akong kasingkasing
Nga kanimo dili na gayud mobagting

Matag adlaw ang ngalan mo gisampit
Ning dughan ko bisan pa napuno sa kasakit
Hinginli kining dughan ko sa pagdumili
Kon ngano ba gayud ikaw ang akong napili

Pukawa kining akong kasingkasing
Sa ngilit sa kamatuoran kini napaling
Aron dawaton ang miabot na kalisdanan
Na ang kinabuhi diay adunay padulngan

Paaboton ko ang hingpit ug tukmang panahon
Mga kasakit karon ako lang sang pagaantoson
Ang kapakyasan sa gugma akong pagasabton
Naglaum sa ugma damlag na ikaw maangkon

Ginampo ko ikaw sa kanunay sa kahitas-an
Gipangandoy ko ikaw sa adlaw nga tanan
Bisan pa ang dagat mahubsan sa mga balud
Na ikaw ang akong higugmaon sa hangtod

Mga Pag-ampo Kang Senyor Santo Niño

Mga Pag-ampo Kang Senyor Santo Niño
By Genamos_US of Washington DC, USA

O Senyor Santo Niño, naga-ampo kami kanimo
Ilawom ning dughan nangayo kami og pasaylo
Ikaw ang among tingpanalipod ug kadangpan
Sa among mga suliran ug sa mga kalisdanan

Ikaw ang among Patron ning among dakbayan
Sa Sugbu, sa Pilipinas ug sa tibook kalibutan
Ikaw gayud ang milagrosong imahe nga balaan
Sapwanga ang among kinabuhi ug kanimo itugyan

Tan-awa kining among mga kasingkasing O Ginoo
Na makalikay sa mga katalagman ug mga peligro
Lamdagi kining among mga hunahuna sa kanunay
Sa pagbuhat og maayo ug sa kasaypanan mahalikay

Tagai kami sa igong kabaskog sa matag adlaw
Aron ipadayon namo ang Imong pagbuot ug laraw
Ayaw kalimti ang among mga tagsatagsa ka pamilya
Nga nagaampo Kanimo Sa Imong proteksyon ug grasya

Hupaya kami sa imong malumo nga kasingkasing
Aron ang among kinabuhi padayon sa pagbagting
Bendisyoni kining among mga hunahuna ug pulong
Aron ang grasya sa langit nga kanamo mopasilong

Dasiga kining among mga kasingkasing sa paghigugma
Dinha Kanimo ug sa tanan mga tawo na walay pagduhaduha
Tabangi kami isalikway ang mga yutan-ong hiyas ug batasan
Aron mahiduol Kanimo ug sa langit puhon kami mahiuban

Tabangi kami nga makapugong sa mga tentasyon
Mahilayo sa mga kadaut ug malaw-ayng bulohaton
Hatagi kami sa igong kaisog nga makigbatok niini
Aron ang among kinabuhi maluwas ug adunay bili

Himoa kami nga wais sigo sa imong kabubot-on ug balaud
Ug dugangi kining among mga pasensiya sa matag kalisod
Papasa kining among pagkahakog sa mga bahandi ug kuwarta
Ug ipuli ang bertud sa pagkamahatagon sa walay pagkaluya

Hinloi kining among mga lawas, hunahuna ug kalag sa mga sala
Nianang imong dugo nga mibanaw sa krus ug kanamo ipadala
Ikaw gayud  O Dios ang hingpit nga dalan sa kamatuoran
Ang kahayag sa among kinabuhi hangtod sa kahangturan

Amen.

Ang Gugma Ko Kanimo Labaw

Ang Gugma Ko Kanimo Labaw
By Genamos_US of Washington DC, USA

Panahon kadto sa tinglagas
Mga dahon sa sanga nanglagas
Ang hangin miabot mabugnaw
Uban sa mga panganod nga siaw

Makita ang mangiob nga kalangitan
Ang mamingaw nga mga kakahuyan
Ang nagpasad ang mga dahong laya
Nga gihabulan ang tabonon na yuta

Gilantaw ko ang mga panganod
Ibabaw sa mga kakahuyan gianod
Gibati ko ang panahon sa kabugnaw
Ang dughan ko napuno sa kamingaw

Matud mo ang gugma ta moluntad
Sa umaabot nga katuigan gihalad
Kung ngano ikaw sa kalit nahanaw
Ning kasingkasing ko kanimo giuhaw

Asa naman ako paingon dinhi karon?
Na ang kalibutan ko dili na mabulokon
Abi ko, imo akong ubanan sa hangtod
Ang gugma ko kanimo ug ikaw nasayod

Ang mga saad sa mga managhigugmaay
Daw usa ka dahong laya nga mogamay
Mangagupok, mapulbos kung kini komkomon
Sama sa atong gugma nawad-an sa sugilanon

Abi ko kadto, nasinati ko na ikaw
Sa pagtoo nga gugma, apan diay taphaw
Ngano man ang pagbati mo sa kalit nausab?
Gibuhat ko ang tanan ug ako kanimo na inlab

Pagakantahon ko nalang ang mga huni ug awit
Na kabahin sa gugma ug kanimo akong idalit
Pamasin sa inanay ikaw magkahanaw ning hunahuna
Aron mabatonan ko ang kalinaw sa gugmang nawala

Gawasnon na ikaw ug andam hikalimtan ko sa dayon
Dili masayon ang pagpasaylo sa gugmang naulipon
Apan kung kini ang pamaagi na makabaton og kalinaw
Akong buhaton kini kay ang gugma ko kanimo labaw

Ang Dagan Sa Akong Kahaponon

Ang Dagan Sa Akong Kahaponon
By Genamos_US of Washington DC, USA

Pagkahanap sa langit ning kahaponon
Nga naputos sa yamog ang talan-awon
Hamoghamog na ulan ang mitaliwan
Ang mamingaw na palibot natilawan

Nabasa ang yuta sa naghilak nga langit
Gibiyaan sa adlaw nga wala siya gisampit
Mga dahon na ngapagba sa iyang punoan
Gitayhop sa hangin nga gikan sa amihan

Malaay na kahaponon ang miabot
Ang mabugnawng kagabhion taliabot
Ang kilomkilom dili na gayud magdugay
Ug ang akong panihapon ako nang giaray

Gilantaw ko pag-usab ang gawas
Mangiob na kalangitan gidimalas
Apan ang mga tanaman naghudyaka
Kay nabusog sa uwan kung nakita

Nagpaingon nga gayud ang panon sa kangitngit
Milupad ang akong hunahuna sama gidagit
Gipadpad ngadto sa lapyahan sa kagahapon
Nakapanghupaw ako sa akong kaugalingon

Gidagsa ang akong hunahuna sa maong kanhiay
Susama nianing panahon nga nagpasumbingay
Dughan ko nagbutobuto sa gugmang naulipon
Kay didto sa dapit kami inday nga malipayon

Didto sa lagkaw ang gugma among gisaw-an
Ang kalipay nga langitnon among gitagayan
Ang imahe ni Inday nga kanako mapahiyomon
Giduwaduwaan lang ako ning akong imahinasyon

Apan sa kalit ang kamot sa hangin mihampas
Sa bintana milagobo ang hangin nga maidlas
Nahigmata ako sa akong lawom nga pangisip
Nahibalik sa kalibutan sa realidad nga misilip

Mapahiyomon ako nga nakurat ug nagkatawa
Ang dagan sa akong kahaponon ako nahigmata
Usahay dili malikayan ang handumanan mosulod
Labi na kabahin kini sa atong kinabuhi sa laktod