Ang Paghuyatid Sa Kinabuhi

Ang Paghuyatid Sa Kinabuhi
By Genamos_US of Washington DC, USA

Magpanuko kita sa pagbulat sa mga butang nahunahunaan
Labi nga kon una pa nato masugatan ug wala’y kasinatian
Mahadlok ta nga matumpawak sa kasaypanan ning kalibutan
Sa mga biaybiay ug tabitabi sa atong mga suod nga kaubanan

Ang kaulaw masinatian kon ang mga sayop maoy ilang basihan
Labi nga wala nato masabtan ang tibook ug tinood na kahulugan
Ngano man kaha mosulod kini sa pangisip sa kinabuhi sa tawo?
Usa kini ka pangutana nga adunay naghulat nga tubag mga amigo

Matag momentong moduaw usahay ipaagi nalang sa mga pasiaw
Aron ang kinabuhi makabyahan sa kabug-at ug kini ilingawlingaw
Ang matag tingog sa katawa ug hilak maoy saksi sa atong gibati
Murag kita’g buang modangoyngoy didto sa sook sa atong nasinati

Usahay ang pagmahay ug kapungot mopatigbabaw ning dughan
Labi nga kadtong mga panghitabo miabot puno sa mga kasakitan
Ang pagpatulo nalang sa mga luha ang dali natong kadangpan
Kay ang atong kaugalingon ang unang momaymay niining tanan

Apan ang kinabuhi sa tawo mag-usab-usab ang dagan
Wala’y permanente ug nagtuyok puno sa mga kausaban
Dili matagna ang yugto sa panahon ang moduaw kanato
Matag adlaw muabot managlahi ug kita mangandam dako

Ang mga kabalaka ug kahinaman sa kanunayng nagauban
Ang matag lihok sa kinabuhi sa tawo dili gayud malikayan
Mao kini ang gasa sa Diyos nga angay natong hinumduman
Nga ang kasakit ug kalipay sa kinabuhi mao ang kamatuoran

Ang tawo gitagaan og dakong kagawasan sa langit sa pagbuhat
Sigo sa gilatid nga mga lagda ug patakaran gipaambit ipabuhat
Ang pagkaplag sa tawo kun unsay iyang tinood nga katuyoan
Aron ang tawo magpuyo sa kalinaw, gugma ug kabulohanan

Ang kinabuhi sa tawo sama sa usa ka sampit sa katulogon
Inig yamar sa kakapoy uban sa mga paghuyab na tulukibon
Ipahulay ang mga kalisdanan uban sa panghinaot sa ugmang gipili
Nga sa pagmata ang grasya sa Diyos mouban sa paghuyatid sa kinabuhi

Ang Kinabuhing Gidala

Ang Kinabuhing Gidala
By Genamos_US of Washington DC, USA

Nasiplatan ko na unta ang akong damgo
Nga migimaw nagpaingon nga misaludo
Apan sa luyo ning ubos kung hunahuna
Adunay tingog mihagawhaw nagbanha

Ang tingog nga nagmando dinhi kanako
Nga ang damgong kab-oton na dili maako
Usahay ang matag tikang sa panahon
Matapigas sa laing dalan adto mopaingon

Ang mga pagsalig ko giuyog nga nagkurog
Sa mga kakulian ug pagsulay nalimbasog
Ang mga paningkamot nga ako mobarog
Nga bisan nahidagma balon ko ang kaisog

Pugson ko ihaangad ang akong panagway
Bisan sa kapalaran kanunayng gisalikway
Bation ko man ang pag-inusara nga naglakaw
Sa panahon nga dili matag-an ang moduaw

Daghan pang muabot ang mga bukid sa kalisdanan
Katkaton ang madanlog ug subidahon na agianan
Andamon ko ang taas nga pasinsiya ning kalibutan
Aron ang kalamposan ug kalipay akong matilawan

Kinahanglan aduna ako’y buhaton sa kaugalingon
Ang pagpadayon sa paglakaw nga madasigon
Nakigsangka padayon sa mga lumot sa kaugmaon
Ang pagtuo sa Diyos nga dili makuhaan ang bation

Usahay ang kapildihan atong matilawan mahiagian
Kay kini man ang kudlit naapil sa atong kapalaran
Ang mga suliran maoy magtudlo kanato sa kaayohan
Nga kita mahimong lig-on ning kinabuhi nga inuslan

Makaluya man ang mga dili paborable nga panghitabo
Sa mga apan sa kinabuhi nga kita dili magpadaug dako
Buhaton ang tanan tang mga damgo mentras buhi pa ta
Kay ang ugma muabot dili matagna ang kinabuhing gidala

Ang Anino Sa Iyang Pahiyom

Ang Anino Sa Iyang Pahiyom
By Genamos_US of Washington DC, USA

Panahon kadto sa tingpamulak
Ang mga putot nga nagbuswak
Niadtong nanglabay nga mga adlaw
Sa daplin baybayon kami naglakaw

Gigunitan ko ang iyang mga kamot
Mga bulak nangalimyon sa kahumot
Ang adlaw nga nagtambo sa dagat
Naibog sa balud nga nagpangidhat

Namasilong kami sa punoan sa talisay
Aron mopahulay sa among pagbaklay
Gitutokan ko ang iyang katahom makalukmay
Ang iyang pahiyum makawala sa kabudlay

Didto ko gikulit ang duha namong mga ngalan
Sa kahoy nga siniprahan sa gugmang hilabihan
Gisugilon ko didto ang tiunay kung pagbati
Nga kaniya ang mga saad ug panumpa gipabati

Gipaambit niya ang iyang mga damgo sa umaabot
Nga siya manimpalad sa gawas nasod ako mosabot
Wala ako magtuo nga may katapusan ang tanan
Sa paglabay sa panahon gikaluhaan sa kausaban

Mga sulat ug tawag nga wala akoy tubag
Mga kabalaka og kalibog nagkatigulaag
Wala ako masayod kung ngano siya nausab
Ang kasingkasing ko murag ako gidunggab

Karon, giduaw ko pagbalik ang maong dapit
Namasin na siya mobalik sa akong pagsampit
Kadtong punoan sa talisay nagpabilin milabong
Misaksi sa duha namong pagbati karon napalong

Ipaanod ko nalang sa mga balod sa kalimot
Sa dagat sa kagahapon misubay ang pagsabot
Ang pagsubli sa kagahapon walay ikapuli
Ang nawagtang nga bulak sa gugmang giwakli

Gihanduraw ko ang anino sa iyang pahiyom
Miduaw kanako nga nagduwaduwa sa katahum
Gipuno sa mga kolor ang damgo kung gilaum
Kaniya ang dughan ko nagpabilin naghandum

Nahinumdom Ka Pa Ba Sa Kaniadto

Nahinumdom Ka Pa Ba Sa Kaniadto
By Genamos_US of Washington DC, USA

Nahinumdom ka pa ba sa kaniadto
Sa atong unang panagtagbo didto
Ang ngabil ko sa una nga nagkurog
Nahadlok ko isulti ang akong kaibog

Gusto ko untang litokon ang mga pulong
Na gihigugma ko ikaw dili mo ikahibulong
Ikaw ang langit nga nabukas ning dughan
Mga mata ko milupad sa kalipay hilabihan

Nahinumdom pa ako sa mga tagak sa luha
Kasingkasing ko nga nagmaya naglumba
Pagbati ko dili matukib ang tumang kasaba
Ilawom ni kasingkasing ikaw ang himaya

Walay pagkalawos ang gugma kung gitapigan
Ang imahe mo nakaimprinta sama sa larawan
Wala ako malimot sa mga saad tang gibalon
Ang pagbati ko kanimo dalisay ug sulondon

Nahinumdom ka pa ba sa dakong baybayon
Nga Ikaw gihabulan sa akong mga bukton
Kay ang bugnawng huyohoy sa hangin miduaw
Uban sa kainit kung gakos ug halok sa kamingaw

Ang hinugan-ob sa mga balod nga misarasay
Sa baybayon nga nagdali muhalok pagkadalisay
Ang nagpadulong nga nahubog na adlaw milandong
Sa langit nga gihabulan sa panganod nga mipasilong

Nahinumdom lang ako sa kanhing kagahapon
Ang duha ka mga kasingkasing ang naulipon
Sa gugmang pagkatam-is nga natilawan ko
Ang kahayag sa akong kinabuhi na uban kanimo

Pagkalaay Nga Adlaw

Pagkalaay Nga Adlaw
By Genamos_US of Washington DC, USA

Paglaay ning sayong kabuntagon
Ang adlaw migawas madasigon
Apan ang dughan ko masulob-on
Sa mga panghitabo ako naulipon

Nahasubo ako sa miaging adlaw
Sa wala magsinabtanay miduaw
Ang panimalay madasigon nahilaw
Sa kaguliyang ako nakapanghupaw

Ang kanhing kagabhion malipayon
Mga katawa ug pahiyom pagkasayon
Ang suliran nga mohapit badlongon
Sa gugma ug pasinsiya pagkatagbuon

Nangandoy ako mahibalik ang kalinaw
Sa matag usa ka dughan pagbati mosumaw
Mga kalisdanan na hinginlan sa kinabuhi
Aron ang kasingkasing dili magkapuliki

Ang matag gutling sa panahon dili usikan
Kay ang kinabuhi hamobo dili talikdan
Sa mga gagmayng kakulian dili masabtan
Ipatigbabaw ang gugma gikan sa kahitas-an

Paaboton ko siya uban sa pagbalik sa adlaw
Puno sa kalipay ug paghigugma nga milakaw
Episan ko ang baso sa bino nga makahupay
Aron kalimtan ang suliran nga midagayday

Bation ko man ang kamingaw na wala siya
Dunggon unta sa langit ang akong pangaliya
Sayod si Bathala wala ko pasipad-i ang saad
Na giampingan ko uban sa gugmang gihalad

Ang Nagsalimoang Nga Pagduda

Ang Nagsalimoang Nga Pagduda
By Genamos_US of Washington DC, USA

Nipahulay nga ang kagabhion
Nahuman nga ko’g panihapon
Nabuhat ko na ang ginbuhaton
Sa kusina ug lababo na hugasonon

Misulod ako sa akong lawak
Mipahulay sa kakapoy nasugamak
Giablihan ko ang balak kung sinulat
Aron lantawon ang blog kon pila’y naglurat

Sama sa naandan ang kakapoy gipulihan
Sa mga sinulat kung balak ako maulian
Mga katawhan sa kahanginan motan-aw
Sa mga pabuhagay sa balak sila mopasiaw

Kadaghanan kanila wala sila magpaila
Sa mga tinagik kung balak sila nadala
Wala akoy law-ay nga gibuhat kanila
Mga balak kung sinulat puro hunahuna ra

Nalingaw ako na aduna diay uban ang nagduda
Kon tinood ba ang nahisulat o tumotumo ra
Sa nagsulat sa balak kini ilang gipangutana
Nga gitubag sagol imahinasyon ug eksperinsiya

Ang pagsulat dili sayon kon atong hunahunaon
Kun unsaon sa paglingaw sa nagsulat sila gitikon
Sa mga pakatawa, pasiaw ug kasakitan pahilakon
Ang dughan sa nagsulat gisagolan sa imahinasyon

Alang sa akong asawa ang pagduda wala tuyoa
Kay ang iyang bana magsusulat wala diay siya kaila
Sa pagsulat og balak siya dakong nasuprisa
Kay siya nagdahom ang iyang bana ordinaryo ra

Dili ba siya angay malipay sa iyang nadiskobrehan
Ang mga sinulat nga balak iya kining ikahimot-an
Dili ko masabot kun ngano iyang kini gikalagotan
Basin kuno ang gisulat adunay tawo na gitagan-an

Ako siya'ng gipasaligan sa gugma kung gitapigan
Sa kasingkasing ko nahipatik ug dili bugalbugalan
Ang mga pagsalig ug saad akong kining giampingan
Aron ang nagsalimoang nga pagduda iyang buhian

Sa Pagtimaan Sa Nakamata Nga Idlas Na Demokrasya

Sa Pagtimaan Sa Nakamata Nga Idlas Na Demokrasya
By Genamos_US of Washington DC, USA

Murag pilahay lang katuig ang milabay
Sa usa panghitabo ang kalibutan naukay
Ang kamatayon sa nipanaw nga bayani
Ang nasud mibarog ug nakahiusa gidani

Lab-as pa sa akong panumduman kaniadto
Nga nagtungha pa ko sa pribadong kolehiyo
Mamingaw nga adlaw ang misugat sa radyo
Nga gibuno sa tugpahanan si Benigno Aquino

Ang nasud pilipinhon sama nga namatyan
Sa usa ka tinahod ug pinalangga nga amahan
Siya nakigbisog sa rehimin nga mangilupigon
Sa mga kabus ug timawa nga mga pilipinhon

Ang iyang mithi ug dalaygon buhat magpabilin
Sa matag kasingkasing natong tanan mihalin
Ang iyang hangyo nga adunay dakong reporma
Sa pamaagi sa gobyerno nga kita magkahiusa

Rebolusyon ang singgit sa walhon nga grupo
Apan kaniya dili kini ang solusyon na guwapo
Ang kalinaw ug kausaban sa malinawong damgo
Apan kini gisalindot ug gibasura murag trapo

Ang iyang imahe kanako usa ka ideyal nga politico
Naglantaw sa kaayohan sa nasud ug nindot nga damgo
Ug siya ang tinubdan sa dakong kusog sa katawhan
Kay ang tingog sa katawhan tingog sa Diyos Amahan

Ang atong demokrasya nakamata sa dugayng panahon
Ang pagkab-ot sa atong tinood na kagawasan dili sayon
Kay gibuhis ang iyang kinabuhi sa bayaning nasodnon
Aron kita mabuhian sa atong katungod nga pilipinhon

Busa dili nato kalimtan ang Agosto 21, 1983 na petsa
Sa pagtimaan sa nakamata nga idlas na demokrasya
Kay dili kita makabaton og kagawasan sama ka hingpit
Kon wala mibanaw ang dugo sa bayani nga gikan sa langit